АҚШ Сенати Украинага 40 млрд долларлик ёрдам ҳақидаги қонун лойиҳасини қабул қила олмади. Сенаторлардан бири овоз беришни блоклади

АҚШ Сенати республикачи сенатор Ренд Полнинг қарори туфайли Украинага 40 миллиард долларлик ёрдам пакетини тақдим этиш бўйича якуний овоз беришни кейинга қолдирди. Пол ҳужжат матнига ўзгартиришлар киритишни талаб қилган, деб ёзмоқда Bloomberg.

Полнинг таъкидлашича, агар қонун лойиҳаси қабул қилинса, 2021 йилдан бери АҚШнинг Украинага кўрсатган умумий ёрдами 60 миллиард долларга етади, бу эса АҚШ Давлат департаменти бюджетидан кўп (Давлат департаментининг 2022 йилги бюджети 58,5 миллиард долларни ташкил этган), бундай миқдор инфляциянинг ўсишини тезлаштириши мумкин.

«Инфляция ўз-ўзидан пайдо бўлмайди. Бу дефицит харажатлари билан боғлиқ», — деб тушунтирди сенатор.

У Украинага қанчалик ҳамдард бўлишидан қатъи назар, «ҳеч қайси хорижий давлатга эмас, балки АҚШ Конституциясига содиқ бўлишга қасамёд қилгани»ни таъкидлади. «Конгресс харажат устига харажат қилмоқчи», — деди сенатор қонун лойиҳасини блоклашдан олдин.

Сенатор қонун лойиҳасига Бош инспектор идорасини Украина билан боғлиқ харажатларни назорат қилишга мажбурловчи ўзгартириш киритишни талаб қилмоқда. «Сиз 40 миллиард долларни ҳеч қандай назоратсиз бериб юбормаслигингиз керак», — деди у.

Reuters агентлигининг таъкидлашича, Полнинг розилигисиз Сенат қонун лойиҳасини қабул қилиш учун узоқроқ жараённи босиб ўтиши керак бўлади.

Шунингдек, бир қатор республикачилар Украинага ёрдам тўғрисидаги қонун лойиҳасига глобал озиқ-овқат инқирози билан боғлиқ чоралар киритилмайтганидан хавотир билдирган. Республикачи сенатор Жон Корниннинг фикрича, Сенат кейинги ҳафта бошида ёрдам пакетини маъқуллайди.

24 февралдан бери АҚШнинг Украинага берган ёрдами 3 миллиард долларни ташкил этди, деб ёзади Reuters, шу билан бирга шахсий санкциялар остида музлатилган маблағлар миқдори 30 миллиард долларни ташкил қилди.

Апрель ойи охирида АҚШ президенти Жо Байден Конгрессдан Киевни қўллаб-қувватлаш учун яна 33 миллиард доллар ажратишни сўраган эди. Байден шунингдек, Конгрессдан россиялик олигархларнинг музлатилган мулкларидан Киевга ёрдамни молиялаштириш учун фойдаланишга рухсат сўраш ниятида эканини маълум қилган.

АҚШ Конгрессининг қуйи – Вакиллар палатаси 11 май куни Байденнинг ташаббусини маъқуллаб, ёрдам миқдорини 40 миллиард долларга оширди. Қарорга 368 нафар конгрессмен ёқлаб, 57 нафари қарши овоз берди.