Ўзбекистон президенти Шавкат Мирзиёев 12—13 май кунлари Фарғона вилоятига бориши тўғрисида хабар берилганди. Давлат раҳбарининг матбуот хизматига кўра, президент Фарғона вилоятига ташрифини Олтиариқ туманидан бошлаган.
Маълум қилинишича, Шавкат Мирзиёев Олтиариқ тумани чеккасида минг гектар адирликда ташкил этилган узумчилик ва боғдорчилик плантациясини бориб кўрган.
Таъкидланишича, илгари бу жой ҳеч нарса экилмайдиган қуруқ ер бўлган. Қишлоқ хўжалигини инновацион ривожлантириш борасидаги ишлар натижасида халқнинг ризқ-рўзи учун минг гектар янги манба пайдо бўлган. Бунинг учун қудуқлар ва ҳовузлар қазилиб, томчилатиб суғориш йўлга қўйилган. Бунда фойдаланилган ускуна ва қувурлар ҳам тўлиқ маҳаллий маҳсулот.
Ўзлаштирилган майдонларнинг 560 гектарида токзор барпо этилиб, «хусайни», «келинбармоқ», «ризамат», «кишмиш» каби харидоргир узум навлари экилмоқда. 300 гектарлик интенсив боғда олма, гилос, ўрик кўчатлари ўтқазилмоқда.
Қатор ораларига тарвуз экилган. Бозор талабига қараб, қалампир, булғор қалампири, бодринг, кўкатлар ва бошқа полиз маҳсулотлари етиштирилади.
«Фарғона қишлоқ хўжалигида катта натижаларга эришяпти, одамларнинг дунёқараши ўзгаряпти, деҳқонлар экспортга чиқяпти. Лекин кечаги натижа бугунга тўғри келмайди. Доим изланишда, ҳаракатда бўлишимиз керак. Мана, салгина шароит яратилгани учун шунча жой боғ бўлди. Ҳали ички имкониятларимиз жуда кўп. Бу имкониятларни «инсон қадри» тамойили асосида халқимиз манфаатига йўналтириш керак. Водий гавҳари Фарғона бунда намуна бўлиши керак», — дейди Шавкат Мирзиёев.
Қайд этилишича, ушбу ер замонавий агросаноат мажмуи бўлади — 1 минг 500 тонна сиғимли музлаткичли омбор, маиший хизмат шохобчалари барпо этилади. 6 та минитрактор, 10 та юк машинаси сотиб олинади. Боғ ва токзорлар аҳолига бўлиб берилади. Бу миришкор олтиариқликлар учун катта имкониятлар яратади.
Давлат раҳбари шу ерда фарғоналик деҳқонлар ва кластер раҳбарлари билан суҳбатлашган.
«Бу боғ ва токзорлар аҳолига хусусийлаштириб берилади. Мулкдор қанча кўп бўлса, масъулият кўп бўлади, харидорларнинг, чет эллик ҳамкорларнинг тадбиркорга ишончи бўлади, одамлар кўпроқ даромад олади», — дейди Президент.
Шунингдек, ҳудудда 3 мингдан ортиқ иш ўрни очилиши айтилган. Уларга ишсиз ёшлар ва эҳтиёжманд оилалар, жумладан, хориждан қайтиб келган меҳнат муҳожирлари ишга олинади. Президент шундай ишчилар билан суҳбатлашган.
Шу ерда Фарғона вилоятида мева-сабзавотчилик ва гулчиликни ривожлантириш бўйича лойиҳалар тақдимот қилинган.
Эслатиб ўтамиз, давлат раҳбари бундан олдин Фарғона вилоятига 2021 йилнинг февралида борган эди. Ўшанда Шавкат Мирзиёев Олтиариқдаги узумчилик кооперациясида бўлган, Фарғонадаги тошдан қоғоз ишлаб чиқариладиган корхонани кўздан кечирган, Водий Shoes корхонасига ташриф буюрганди.
Изоҳ (0)