O‘zbekiston prezidenti Shavkat Mirziyoyev 12—13-may kunlari Farg‘ona viloyatiga borishi to‘g‘risida xabar berilgandi. Davlat rahbarining matbuot xizmatiga ko‘ra, prezident Farg‘ona viloyatiga tashrifini Oltiariq tumanidan boshlagan.
Ma’lum qilinishicha, Shavkat Mirziyoyev Oltiariq tumani chekkasida ming gektar adirlikda tashkil etilgan uzumchilik va bog‘dorchilik plantatsiyasini borib ko‘rgan.
Ta’kidlanishicha, ilgari bu joy hech narsa ekilmaydigan quruq yer bo‘lgan. Qishloq xo‘jaligini innovatsion rivojlantirish borasidagi ishlar natijasida xalqning rizq-ro‘zi uchun ming gektar yangi manba paydo bo‘lgan. Buning uchun quduqlar va hovuzlar qazilib, tomchilatib sug‘orish yo‘lga qo‘yilgan. Bunda foydalanilgan uskuna va quvurlar ham to‘liq mahalliy mahsulot.
O‘zlashtirilgan maydonlarning 560 gektarida tokzor barpo etilib, “xusayni”, “kelinbarmoq”, “rizamat”, “kishmish” kabi xaridorgir uzum navlari ekilmoqda. 300 gektarlik intensiv bog‘da olma, gilos, o‘rik ko‘chatlari o‘tqazilmoqda.
Qator oralariga tarvuz ekilgan. Bozor talabiga qarab, qalampir, bulg‘or qalampiri, bodring, ko‘katlar va boshqa poliz mahsulotlari yetishtiriladi.
“Farg‘ona qishloq xo‘jaligida katta natijalarga erishyapti, odamlarning dunyoqarashi o‘zgaryapti, dehqonlar eksportga chiqyapti. Lekin kechagi natija bugunga to‘g‘ri kelmaydi. Doim izlanishda, harakatda bo‘lishimiz kerak. Mana, salgina sharoit yaratilgani uchun shuncha joy bog‘ bo‘ldi. Hali ichki imkoniyatlarimiz juda ko‘p. Bu imkoniyatlarni “inson qadri” tamoyili asosida xalqimiz manfaatiga yo‘naltirish kerak. Vodiy gavhari Farg‘ona bunda namuna bo‘lishi kerak”, — deydi Shavkat Mirziyoyev.
Qayd etilishicha, ushbu yer zamonaviy agrosanoat majmui bo‘ladi — 1 ming 500 tonna sig‘imli muzlatkichli ombor, maishiy xizmat shoxobchalari barpo etiladi. 6 ta minitraktor, 10 ta yuk mashinasi sotib olinadi. Bog‘ va tokzorlar aholiga bo‘lib beriladi. Bu mirishkor oltiariqliklar uchun katta imkoniyatlar yaratadi.
Davlat rahbari shu yerda farg‘onalik dehqonlar va klaster rahbarlari bilan suhbatlashgan.
“Bu bog‘ va tokzorlar aholiga xususiylashtirib beriladi. Mulkdor qancha ko‘p bo‘lsa, mas’uliyat ko‘p bo‘ladi, xaridorlarning, chet ellik hamkorlarning tadbirkorga ishonchi bo‘ladi, odamlar ko‘proq daromad oladi”, — deydi Prezident.
Shuningdek, hududda 3 mingdan ortiq ish o‘rni ochilishi aytilgan. Ularga ishsiz yoshlar va ehtiyojmand oilalar, jumladan, xorijdan qaytib kelgan mehnat muhojirlari ishga olinadi. Prezident shunday ishchilar bilan suhbatlashgan.
Shu yerda Farg‘ona viloyatida meva-sabzavotchilik va gulchilikni rivojlantirish bo‘yicha loyihalar taqdimot qilingan.
Eslatib o‘tamiz, davlat rahbari bundan oldin Farg‘ona viloyatiga 2021-yilning fevralida borgan edi. O‘shanda Shavkat Mirziyoyev Oltiariqdagi uzumchilik kooperatsiyasida bo‘lgan, Farg‘onadagi toshdan qog‘oz ishlab chiqariladigan korxonani ko‘zdan kechirgan, Vodiy Shoes korxonasiga tashrif buyurgandi.
Izoh (0)