Самарқандда икки қаватли савдо мажмуасида ёнғин чиқди (видео)

Самарқанд вилояти Қўшработ туманида жойлашган савдо мажмуасида ёнғин содир бўлди, деб хабар беради ФВВ матбуот хизмати.

Маълум қилинишича, 12 май куни тунги соат 00:33 да туманнинг «Намуна» МФЙ, Эргашжуман Булбул кўчасида жойлашган Entrogroplyus МЧЖга қарашли икки қаватли савдо мажмуасида ёнғин содир бўлаётгани тўғрисида туман ФВБга хабар келиб тушган.

Воқеа жойига 7 та ёнғин-қутқарув экипажи жалб этилган. Ёнғинга соат 00:42 да етиб борилган ва соат 03:52 да ёнғин тўлиқ бартараф этилган.

Ёнғин натижасида савдо мажмуасининг тахминан 250 квадрат метр майдонда шифт, том қисми, биринчи қаватдаги озиқ-овқат маҳсулотлари, маиший техникалари ва бошқа турдаги жиҳозлар ёниб зарарланган.

Ҳодиса оқибатида ҳалок бўлган ва жабрланганлар йўқ. Ҳозирда ёнғиннинг келиб чиқиш сабаби ва келтирилган моддий зарар миқдори аниқланмоқда.

Аввалроқ Сирдарёда масжид ҳовлисида ёнғин юзага келгани, Бухородаги қурилиш моллари цехида ёнғин содир бўлгани, Тошкентдаги озиқ-овқат дўконларининг бирида ёнғин чиққани тўғрисида хабар берилганди.