Самарқанд туманида Nexia каналга ағдарилиши оқибатида уч киши ҳалок бўлди. Бу ҳақда Самарқанд вилояти Ички ишлар бошқармаси ахборот хизмати хабар берди.
Маълум бўлишича, воқеа 8 май куни соат 02:40 атрофида туманнинг «Бадал» МФЙ ҳудудида содир бўлган. Nexia автомобили ҳайдовчиси ҳаракатланиб кетаётиб бошқарувни йўқотган ва машинанинг орқа ён қисми билан каналга ағдарилган.
Машинанинг олд ўриндиқларидаги ҳайдовчи ва йўловчи сувдан чиқишга улгурган, орқада ўтирган 3 фуқаро — 15, 16 ҳамда 29 ёшли йигитлар ҳалок бўлган. Уларнинг икки нафари Самарқанд тумани 24-сонли мактабнинг ўқувчиси бўлган.
Мазкур ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, тергов ҳаракатлари олиб борилмоқда.
Бундан аввал Тошкентда Cobalt каналга тушиб кетгани, Самарқандда Damas ҳайдовчиси каналга тушиб кетгач, бедарак йўқолгани тўғрисида хабар берилганди.
Изоҳ (0)