Бўстонлиқ туманига сармоя киритишда тадбиркорларга имтиёзлар тақдим этилмоқда

«Чорвоқ» туристик зонасига сармоя киритган тадбиркорларга бир қатор имтиёзлар тақдим этилади. Бу ҳақда Туризм ва маданий мерос вазирлиги хабар берди.

Киритилган инвестициялар ҳажмига қараб, мол-мулк солиғидан, ер солиғидан ва сув ресурсларидан фойдаланганлик учун солиқдан қуйидаги муддатларга озод қилиш тарзида солиқ имтиёзлари берилади:

• 300 млн АҚШ долларидан 3 млн АҚШ долларигача ҳажмдаги инвестициялар – 3 йил муддатга;
• 3 млн АҚШ долларидан 5 миллион АҚШ долларигача ҳажмдаги инвестициялар – 5 йил муддатга;
• 5 млн АҚШ долларидан 10 миллион АҚШ долларигача ҳажмдаги инвестициялар – 7 йил муддатга.
• 10 млн АҚШ доллари ва ундан ортиқ инвестиция киритилганда — 10 йил муддатга, кейинги 5 йил мобайнида фойда солиғи ва ягона солиқ тўлови ставкалари амалдаги ставкалардан 50 фоиз паст миқдорда қўлланилган ҳолда берилади.

«Чорвоқ» туристик рекреацион зонаси иштирокчилари қуйидаги тўловлардан озод этилади:

• Республикада ишлаб чиқарилмайдиган ва инвестиция битимига мувофиқ лойиҳани амалга оширишда қурилиш материаллари учун божхона тўловлари (бундан қўшимча қиймат солиғи ва божхона расмийлаштируви учун йиғимлар мустасно);
• Ўзбекистонда ишлаб чиқарилмайдиган технологик ускуналарни олиб киришда божхона тўловлари (бундан божхона расмийлаштируви учун йиғимлар мустасно);
• Товарларни импорт қилганда қўшилган қиймат солиғини 120 кунгача муддатга кечиктириб тўлаши мумкин.

Қўшилган қиймат солиғи суммасининг ошиб кетиши натижасида ҳосил бўлган сумманинг ўрни махсус иқтисодий зона иштирокчисига етти кун давомида соддалаштирилган тартибда қоплаб берилади.

Тўланган қўшилган қиймат солиғи суммаси махсус иқтисодий зона иштирокчиларига республика бюджетидан Вазирлар Маҳкамаси томонидан белгиланадиган тартибда қоплаб берилади.

Янги дор йўлларини қуриш ва жиҳозлаш учун давлат томонидан субсидия ажратиб берилади:

• Давлат субсидияси йўловчи ташувчи янги дор йўлларини 2023 йил 31 декабрга қадар фойдаланишга топшириш ва узунлиги бир томонга 500 метрдан кам бўлмаслик шарти билан дастлабки 50 та лойиҳага ажратилади;
• Субсидия бир марта ажратилади ҳамда унинг миқдори ҳар 500 метр йўл учун 1 миллиард сўмни ташкил қилади.

Янги меҳмонхонани қуриш ва жиҳозлаш учун инвесторлар харажатларининг бир қисми бюджети маблағлари ҳисобидан қоплаб берилади.

3 юлдузли тоифа учун 50 та хонадан кам бўлмаган ва 4 юлдузли тоифа учун 100 та хонадан кам бўлмаган фондга эга меҳмонхона 2023 йил 31 декабргача фойдаланишга топширилса янги меҳмонхонани қуриш ва жиҳозлаш учун инвесторлар харажатларининг бир қисми, бунда:

• 3 юлдузли тоифага эга меҳмонхоналардаги ҳар бир хона учун 40 млн сўм;
• 4 юлдузли тоифага эга меҳмонхоналардаги ҳар бир хона учун 65 млн сўмни ташкил қилади.

Шунингдек, дунёнинг таниқли ва нуфузли меҳмонхона брендларидан фойдаланиш бўйича Ўзбекистон резидентлари бўлган ташкилотлар учун роялти франчайзинг тўғрисидаги шартнома кучга кирган вақтдан бошлаб уч йил мобайнида Давлат бюджети маблағлари ҳисобидан қуйидаги ҳажмда қисман молиялаштирилади:

• меҳмонхонанинг битта хонаси учун йиллик 200 АҚШ доллари эквивалентида;
• дастлабки 30 та 4 юлдузли тоифага эга меҳмонхона — ҳар бир меҳмонхонанинг битта хонаси учун йиллик 400 АҚШ доллари эквивалентида.

Бундан ташкилотлар учун роялтини молиялаштиришнинг умумий ҳажми кўпи билан 10 млн АҚШ доллари эквивалентига тенг бўлади.

Ўзбекистон ҳудудига 2024 йил 1 январга қадар олиб киришда қуйидаги товарлар ва транспорт воситалари учун қонунчиликда назарда тутилган божхона божи бўйича имтиёзлари белгиланган:

Дор (осма) йўллари, тоғ-чанғи кўтаргичлар, фуникулёрлар ва бошқа ўхшаш объектлар, «банжи-жампинг» ва «зиплайн» аттракционлари, бошқариладиган (дирижабл, ҳаво шари) ва бошқарилмайдиган (эркин учиш) аэростатлар, гондолалар, «рафтинг» ва «флайбординг» учун ускуналар, механизмлар ва эҳтиёт қисмлар, шунингдек, buggy car, фаетонлар, жойлаштириш воситаси сифатида тунаб қолиш учун жиҳозланган (ғилдирак устидаги уйлар) ёки кафе-фургонларга айлантирилган «фудтрак» ер усти транспорт воситалари, моторли қайиқ ва квадротцикллар.