Apple iPod Touch ишлаб чиқаришни тўхтатди

iPod Touch энди ишлаб чиқарилмайди. Бу ҳақда Apple ўзининг расмий веб-сайтида «Мусиқа давом этади» сарлавҳаси остида маълум қилди.

Компаниянинг тушунтиришича, мусиқа плеерига мустақил маҳсулот сифатидаги эҳтиёж йўқолган. Бунга сабаб, унинг функциялари смартфон ва планшетларнинг ажралмас қисмига айланганидир.

Плеерлар дўконлардаги захиралар тугамагунча сотувда қолади.

Мусиқа ҳар доим Apple учун энг муҳим соҳалардан бири бўлиб келган. iPod уни бутун дунё бўйлаб юз миллионлаб фойдаланувчиларга етказиши нафақат мусиқа саноатига таъсир қилган, балки мусиқани қандай топишимиз, тинглашимиз ва баҳам кўришимизни қайта кашф қилган. iPod руҳи бугунги кунда ҳам яшайди, — деди Apple компаниясининг маркетинг бўйича катта вице-президенти Грег Жосвиак.

iPod Touch сўнгги русумдаги қурилма эди – бошқа моделлардан фарқли ўлароқ, у браузер ва рақамли камерага эга бўлган.

Биринчи Тоуч 2007 йилда тақдим этилган. iPod’лар бозорда 2001 йилдан бери, яъни механик айлантириш ғилдираги бўлган оригинал iPod Classic сотувга чиқарилгандан бери мавжуд. Энг сўнгги, олтинчи авлоднинг классикаси 2014 йилда тўхтатилган.

Аввалроқ Apple 4 май, чоршанба куни савдолар ёпилганидан бери 220 млрд доллар йўқотгани ҳақида хабар берилган эди.