Испания разведкаси миллий маркази раҳбари (CNI) Пас Эстебан Pegasus дастурий маҳсулоти билан бир қатор каталониялик сиёсатчиларнинг телефондаги суҳбатларини ёзиб олишга уринишлар бўлгани туфайли истеъфога чиқди. Бу ҳақда бир қатор испан ОАВ ахборотига таяниб, The Guardian хабар қилган.
Хусусан, Каталония женералитетининг президенти Пере Арагонеснинг телефонига киберҳужум уюштирилган. Шунингдек, Pegasus дастурий таъминотидан бош вазир Педро Санчес, мудофаа вазири Маргарита Роблеснинг телефонларига ҳужум қилишда фойдаланилган.
Ўтган ҳафтада Эстебан Испания парламентининг қуйи палатасига берган ахборотида 18 нафар каталониялик сиёсатчилар ҳаёти яширин равишда кузатилганини тасдиқлаган. Мазкур хабар тарқалишидан икки ҳафта аввал киберхавфсизлик соҳасидаги экспертлар мустақиллик учун курашаётган камида 63 нафар каталониялик сиёсатчи Pegasus дастури ёрдамида кузатилгани хусусида ахборотлар пайдо бўлган.
Ўз навбатида Арагонес мазкур можаронинг Каталониядаги чигал вазиятни дипломатик йўл билан тартибга солишни янада қийинлаштиришини билдирган.
The Guardian’нинг ёзишича ҳудуд мустақиллиги учун курашаётган, испан ҳукумати билан иттифоқдаги «Каталония сўл республикачилари» партияси Мадриддан йўқотилган ишончни тиклашни талаб қилган.
Аммо бош вазир Санчес вакили бўлган Испания социалист ишчилар партияси, яна бошқа уч партия билан биргаликда ҳодисани парламент тартибида текширишни тақиқлаб қўйган. Партия вакили CNI ички текширувни бошлагани туфайли парламент суриштирувини ўтказиш зарурати йўқлигини қайд этган.
Аввал Испания қироли мол-мулки ҳақидаги декларацияни эълон қилгани ҳақида хабар берилганди.
Изоҳ (0)