Филиппин Марказий сайлов комиссияси мамлакатда ўтказилган президентлик сайловларининг дастлабки натижаларини эълон қилди, унга кўра 64 ёшли кичик Фердинанд Маркос ҳамма номзодлардан кўпроқ овоз олган. Бу ҳақда Reuters хабар берди.
98 фоиз сайлов бюллетенларининг ҳисоб-китоби унинг 31 миллион овоз олганини, энг яқин таъқибчи, асосий рақиб вице-президент эса бундан икки баравар кам овозга эга эканлигини кўрсатмоқда. Сайловларнинг расмий натижалари ой охирида эълон қилинади, янги президент 30 июнь куни ўз лавозимида ишга киришади.
Филиппин МСК эълон қилган натижалардан кейин пойтахт кўчаларида халқнинг норозилик намойишлари бошланиб кетди. Юзлаб филиппинликлар, асосан, талаба ёшлар МСК биноси олдидан намойишкорона пиёда ўтишди ва у ерда сайловларда кузатилган қонун бузилиши ҳолатлари ҳақида ҳайқиришди.
Карапатан ҳуқуқни ҳимоя қилиш ташкилоти филиппинликларни кичик Маркоснинг президент лавозимини эгаллашига қарши чиқишга чақирган, ташкилот вакилларининг сўзларига кўра Маркос ҳокимияти ёлғон ҳамда нотўғри ахборотга қурилган, асосий мақсад эса Маркослар оиласининг ҳукуматга қайтиш – ёвуз истагини амалга оширишдан иборат. Намойишлардаги етакчилардан бири Ренато Рееснинг айтишича, иштирокчилар диктатор Маркоснинг меросхўрини ҳокимият тепасига қайтараётган Филиппин давлат бошқаруви тизимини қораламоқда.
Кичик Фердинанд Маркос 1986 йилда оиласи билан биргаликда мамлакатда «халқ ҳокимияти исёни» номини олган ҳарбий тўнтариш амалга оширилганидан кейин Гавайи оролларига қочиб кетган. Катта Маркос президентлиги даврида зўравон авторитар бошқарув, ҳукуматда коррупциянинг илдиз отиши ва мазкур тизимга қарши чиққанларнинг қатағони кузатилган. Бироқ кичик Маркос 1991 йилда Филиппинга қайтган ва кўп йиллар давомида Конгресс аъзоси бўлган. Президентлик сайловларида у оммавий дебатларда иштирок этмаган, интервью бермаган ва аниқ сиёсий дастурга эга бўлмаганига қарамай ижобий натижага эришган.
Кичик Фердинанд Маркос отасини даҳо давлат арбоби деб эътироф қилгани жуда кўп марта танқидларга учраган. Кузатувчилар кичик Фердинанд Маркоснинг вице-президентлик лавозимига амалдаги давлат раҳбари Родриго Дутертенинг қизи Сара Дутерте-Карпиони танлаб жуда яхши тактик ҳийла ишлатганини таъкидламоқда. Родриго Дутерте гиёҳванд моддалар савдосига қарши кураш вақтида минглаб одамларни судсиз ўлдириб юборганликда гумон қилинади. Экспертлар кичик Маркоснинг Дутерте сиёсатини давом эттиришини тахмин қилган.
Изоҳ (0)