Ижтимоий тармоқларда Самарқанд вилоятининг баъзи туманларига кучли сел келгани тасвирланган видео тарқалди. Самарқанд вилояти ФВБ ҳолат юзасидан маълумот берди.
Маълум қилинишича, 9 май кунидан 10 май кунига ўтар кечаси Самарқанд тумани «Юқори Оҳалик» МФЙда қисқа муддатли кўп миқдорда ёмғир ёғиши натижасида ушбу ҳудуддан оқиб ўтувчи сойга ёмғир сувлари сиғмай, тошиб чиқиш ҳолати юзага келган.
Ҳодиса оқибатида тахминан соат 23:30 ларда ушбу маҳаллада яшовчи фуқаро М.А. га тегишли бўлган «ВАЗ-21011» русумли автомобиль яшаш уйи яқинидаги сой сув йўлида қолгани сабабли келаётган ёмғир сувлари уни тахминан 40-50 метр масофага суриб борган, натижада автомобилга қисман зарар етган.
Ҳодиса оқибатида тан жароҳати олган ва ҳалок бўлганлар йўқ. Мазкур ҳолат юзасидан туман ФВБга фуқаролар томонидан мурожаатлар келиб тушмаган.
Эслатиб ўтамиз, Волгабўйи ҳудудларидан нам ва нисбатан салқин ҳаво массалари кириб келиб, кучли ёғингарчилик кузатилгани сабаб Ўзбекистоннинг айрим ҳудудлари, хусусан, Жиззах, Сирдарё, Сурхондарё вилоятларида сел оқимлари ва тошқинлар юзага келди. Пойтахт кўчаларини ҳам сув босди.
Изоҳ (0)