Ўзбекистоннинг 20 та энг кўп фойда кўрган давлат корхонаси маълум бўлди

Давлат активларини бошқариш агентлиги давлат иштирокидаги корхоналарнинг молиявий ҳисоботлар таҳлилини эълон қилди.

2021 йил якуни бўйича энг юқори соф фойда олган 20 та корхона рўйхати тузилди.

Ушбу корхоналар ўтган йили жами 23,7 трлн сўм фойда кўрган.

• Биринчи ўринда «Навоий кон-металлургия комбинати» — 10,6 трлн сўм.
• Иккинчи ўринда «Олмалиқ кон-металлургия комбинати» — 5,3 трлн сўм.
• Учинчи ўринда «Ўзбекнефтгаз» — 3,3 трлн сўм.

Тўртинчи ўринда «Ўзбекистон металлургия комбинати» (1,4 трлн сўм), бешинчи ўринда «Навоийазот» (779,8 млрд сўм).

Кейинги ўринларда «Ўзбектелеком» (473,9 млрд сўм), «Ҳудудий электр тармоқлари» (400,3млрд сўм), «Фарғонаазот» (348,8 млрд сўм), «Агрокластер» (194,8 млрд сўм) ва «Ўзбекистон Республикаси товар хом ашё биржаси» (140,1 млрд сўм) корхоналари.

2020 йил билан солиштирганда нималар ўзгарди?

2020 йилда 20 та энг кўп фойда кўрган компаниялар жами 9,5 трлн сўм топган эди. 2021 йилдаги кескин ўсишни пандемия чекловлари олиб ташланганлиги билан ифодаласа бўлади.

Бундан ташқари, рўйхатдан Ucell ва Coca-Cola чиқиб кетди, чунки улар 2021 йилда хусусийлаштирилди. Uzbekistan Airways зарар кўраётган компаниялардан фойда кўрганларга қўшилди.

«Навоий кон-металлургия комбинати» 2021 йилда энг кўп фойда кўрган корхоналар таркибига қўшилди ва рейтингда биринчи ўринни эгаллади (10,6 трлн сўм).