АҚШ биринчи хоними Жилл Байден 5—9 май кунлари Руминия ва Словакияга ташриф буюриб, америкалик ҳарбийлар ва дипломатлар, шунингдек, украиналик қочқинлар билан учрашади, дея хабар бермоқда Reuters агентлиги унинг идорасига таяниб.
6 май куни АҚШ президенти Жо Байденнинг рафиқаси ҳарбийлар билан учрашиш учун Руминия шарқида, Қора денгиз яқинидаги «Михаил Когелничану» авиабазасига ташриф буюради, сўнгра Руминия ҳукумати расмийлари, америкалик дипломатлар ва гуманитар соҳа ходимлари билан учрашиш учун Бухарестга боради.
Словакияда Байден хоним Братислава, Кошице ва Вишне-Немес шаҳарларига ташриф буюради, шунингдек, маҳаллий расмийлар, украиналик қочқинлар ва гуманитар ёрдам ходимлари билан учрашади.
АҚШда оналар куни бўлган 8 майда Жилл Байден жанговар ҳаракатлар пайтида Украинани тарк этишга мажбур бўлган украиналик аёллар ва болалар билан учрашади.
Февраль ойи ўрталарида НАТО Европанинг 30 та давлатида, биринчи навбатда, Болгария, Словакия ва Руминияда кўп миллатли ҳарбий контингентлар сонини кенгайтиришга қарор қилганди. Бунгача альянснинг жанговар гуруҳлари фақат Польша, Эстония, Латвия ва Литвада жойлашган эди.
Wall Street Journal газетаси 2 апрель куни Руминиядаги «Михаил Когелничану» ҳарбий базасидаги НАТО давлатлари аскарларининг сони бир неча ҳафта ичида 3 минг нафарга етганини маълум қилди. Айни пайтда 1,9 минг киши — АҚШ аскари, уларнинг бир қисми Германиядан кўчириб келинган. Бундан ташқари, базада 500 га яқин француз ҳарбийлари ва 300 га яқин бельгиялик ҳарбий хизматчилар жойлашган.
4 февраль куни АҚШ ва Словакия ҳам Вашингтонга мамлакатдаги ҳаво базалари ва бошқа ҳарбий иншоотлардан фойдаланиш ҳуқуқини берувчи ҳарбий ҳамкорлик шартномасини имзолаган.
Изоҳ (0)