Украина портларида 4,5 миллион тоннага яқин дон тўпланиб қолган, уларни олиб чиқишнинг имкони йўқ, деди Германиядаги БМТ Жаҳон озиқ-овқат дастури директори Мартин Фрик.
«Ҳозирда деярли 4,5 миллион тонна дон Украина портлари ва кемаларида блокланиб қолган, улардан фойдаланиш имконсиз», — деди Фрик.
У очликдан на сиёсий, на иқтисодий қурол сифатида фойдаланмаслик кераклигини қайд этди. Озиқ-овқат дастури раҳбарининг таъкидлашича, муаммо икки томонлама: озиқ-овқат маҳсулотлари «глобал озиқ-овқат инқирозини юмшатиш учун» ҳам Украина ҳудудидаги, ҳам дунёнинг бошқа мамлакатларидаги одамларга етиб бориши керак.
БМТнинг Озиқ-овқат ва қишлоқ хўжалиги ташкилоти (FAO) маълумотларига кўра, Украина буғдой экспорти бўйича бешинчи ўринни эгаллаб, жаҳон бозорида унинг улуши қарийб 10 фоизни ташкил этади. Шунингдек, у энг йирик маккажўхори экспортчиларидан бири ҳисобланади — жаҳон экспортидаги улуши 15 фоиз атрофида.
Россия ҳам жаҳон бозорида қарийб 17 фоиз улуши билан буғдой экспорти бўйича дунёда етакчилардан ҳисобланади, кунгабоқар уруғи етказиб бериш бўйича эса иккинчи ўринда туради.
Франция президенти Эммануэль Макрон март ойи охирида Украинадаги воқеалар туфайли дунёда «мисли кўрилмаган» озиқ-овқат инқирози хавфи ҳақида огоҳлантирганди. «Бу ҳолат бир қатор мамлакатларда оғир гуманитар вазиятларга сабаб бўлади ва, шубҳасиз, улкан сиёсий оқибатларга олиб келади», — деган у. Франция президенти бу борадаги вазият 1-1,5 йил ичида янада ёмонлашишидан огоҳлантирган.
Шундан сўнг АҚШ президенти Жо Байден франциялик ҳамкасбининг фикрига қўшилиб, чиндан ҳам озиқ-овқат тақчиллиги юз беришини айтди. Унинг қўшимча қилишича, G7 га аъзо давлатлар озиқ-овқат тақчиллигини камайтириш мақсадида буғдой етиштиришни кўпайтириш чораларини муҳокама қилган.
Изоҳ (0)