28 апрель куни кечқурун Киев маркази ўққа тутилди. Шаҳар мери Виталий Кличко шаҳарнинг Шевченко туманига иккита ракета урилганини маълум қилди. Ўз навбатида, Украина Ички ишлар вазирлиги раҳбари маслаҳатчиси Антон Герашенко Лукяновка тумани ҳам ўққа тутилганини айтди.
Шевченко туманининг ўққа тутилиши оқибатида уч киши жароҳат олган, улар касалхонага ётқизилди, деди Виталий Кличко. Антон Герашенко эса Лукяновка туманида олти нафар ярадор борлигини айтди. Украина фавқулодда вазиятлар давлат хизмати ракета зарбаси туфайли 25 қаватли турар жой биносида ёнғин чиққанини маълум қилди. Унга кўра, биринчи ва иккинчи қаватлар шикастланган, 10 киши жароҳатланган, беш киши қутқариб олинган.
Украина президенти офиси маслаҳатчиси Михаил Подолякнинг қайд этишича, Киевдаги портлашлар шаҳарга БМТ бош котиби Антониу Гуттеришнинг ташрифи чоғида содир бўлган.
«Кеча у (Гуттереш) Кремлдаги узун стол атрофида ўтирганди, бугун эса ундан бир километр нарида портлаш содир бўлмоқда. Бу Москвадан саломларми? Нега Россия ҳали ҳам БМТ Хавфсизлик кенгашида ўрин эгаллаб турибди?», — деб ёзган Подоляк Twitter’да. БМТ Бош котиби идораси унинг Киевда, хавфсиз ҳолатда эканини маълум қилди.
Давлат Фавқулодда вазиятлар хизмати вакили, шунингдек, Киев вилоятидаги «инфратузилма объектлари» ўққа тутилгани ҳақида ҳам хабар берган. Бунинг оқибатлари ўрганилмоқда.
Бундан ташқари, ОАВ Одессада бир нечта портлашлар содир бўлганини хабар қилди. Одесса вилояти ҳарбий бошқармаси раҳбари Максим Марченко Украина ҳаво ҳужумидан мудофаа кучлари Одесса вилояти осмонида учта ракетани уриб туширганини айтди.
Изоҳ (0)