АҚШ президенти Жо Байден конгрессга Украинани қўллаб-қувватлаш учун 33 миллиард доллар ажратиш юзасидан мурожаат қилди. Бу ҳақда АҚШ президенти администрациясидаги манбасига таяниб Reuters хабар берган. Кейинроқ АҚШ президенти Оқ уйда мазкур қарори ҳақида баёнот қилди.
«Мазкур қонун лойиҳаси Украинани эркинлик курашида қўллаб-қувватлашимиз учун керак. Ушбу курашнинг товони арзон эмас, лекин зўравонликка таслим бўлишнинг қиймати янада қиммат», — дейилади Байденнинг баёнотида.
Умумий маблағнинг 20 миллиард доллари қурол-яроғ ва ҳарбийлар таъминотига сарфланади, шунингдек, бошқа ҳарбий техникалар хариди ва олиб келиниши учун ишлатилади, 8,5 миллиард доллар тўғридан-тўғри иқтисодий кўмак, 3 миллиард доллар эса гуманитар ёрдам ва озиқ-овқат хавфсизлигини таъминлашга йўналтирилади.
«Бу украиналик ҳарбийлар ва полицияга тезкор равишда зарур қурилмалар, ўқ-дорилар, бронетехника, ўқотар қуроллар етказилишини таъминлайди. Шу билан бирга, миналаштириш ва дронлар тизимларига тақдим қилинади. Иқтисодий ёрдам инқирозга қарши курашаётган ва фуқароларига асосий хизматлар кўрсатилишига масъул бўлган Украина ҳукуматини тўғридан-тўғри бюджет кўмаги билан таъминлайди», — дея қайд этган Байден ўз баёнотида.
Бундан ташқари, Байден АҚШ конгрессидан россиялик олигархларнинг музлатилган мол-мулкидан Украинага ёрдамни молиялаштиришни сўраган.
Шунингдек, Байден конгрессдан Россия билан коррупцион келишувлар орқали пул ювиш операцияларини амалга оширганлик учун беш йилдан ўн йилгача қамоқ жазоси тайинлаш юзасидан қонунчиликка ўзгартиришлар киритишни ҳам илтимос қилган.
«Мазкур таклифлар давлатимиз томонидан халқаро ҳамкорлар билан биргаликда амалга оширилаётган чоралар, жумладан, россиялик олигархлар активларини тергов қилиш, суд тартибида мусодара қилиш ва бу орқали улардан Украина учун фойдаланишни жадаллаштиради», — дейилган баёнотда.
Reuters’нинг қайд этишича, 24 февралдан АҚШнинг Украинага умумий ёрдами миқдори 3 миллиардни ташкил қилган. Бу вақт ичида персонал санкциялар доирасида музлатилган маблағлар миқдори эса 30 миллиард доллар.
АҚШ охирги ҳафталарда Украинага ёрдамларни янада кўпайтирган. 21 апрелда Байден Украинага 800 миллион долларлик навбатдаги ёрдам пакети етказилишини эълон қилган, ушбу кўмакка тактик дронлар, гаубицалар, артиллерия снарядлари партияси кирган.
24 апрелда Пентагон раҳбари Ллойд Остин ва АҚШ давлат котиби Энтони Блинкен Киевга келган, бу ерда Украина президенти Владимир Зеленский билан учрашиб, мамлакат мудофааси учун 322 миллион доллардан зиёд маблағ ажратилишини ваъда қилганди. Апрель ойида Вашингтон Киевга умумий миқдори 1,2 миллиардлик навбатдаги ҳарбий ёрдам транши етказиб берилиши ҳақида бир неча марта баёнот берган. Бунгача АҚШ Украинага 1,7 миллиарддан зиёд пул ажратганди. Бошқа мамлакатлар ҳам Украинага ҳарбий кўмак беришда давом этмоқда.
Зеленский 23 апрелда Киевнинг ҳамкорларидан сўралган қурол-яроғларни олишни бошлаганини билдирган. У гап айнан қайси давлатлардан етказиб берилаётган қуроллар ҳақида бораётганига аниқлик киритмаган. Бироқ Украина президенти оғир артиллерия қуролларига талаб юқори эканлиги ҳақида бир неча марта гапирганди.
Кремль Украинага қурол етказиб берилиши ҳудуддаги вазиятни беқарорлаштириши, мамлакатдаги барқарорлик ва тартибнинг тикланишига қарши ишлашини қайд этган. Россиянинг АҚШдаги элчиси Анатолий Антонов қуролларнинг кўп қисми безорилар, миллатчилар, террорчилар ва собиқ маҳбуслар қўлига тушиши мумкинлигидан хавотирдалигини айтган. Москва 25 апрелда Вашингтонга норозилик нотаси йўллаган ва унда Киевга қурол етказиб беришни тўхтатишини талаб қилган.
Изоҳ (0)