Британия армиясининг 8 мингга яқин ходими Шарқий Европадаги машғулотларда қатнашади, машғулотлар мақсади «Россия агрессиясига қарши кураш бўйича ҳаракатларни ишлаб чиқиш», деб ёзади The Guardian. Манёврлар ёзда бўлиб ўтади, улар Совуқ урушдан кейинги энг йирикларидан бири бўлади.
Буюк Британия Мудофаа вазирлиги машғулотлар анча аввал режалаштирилганини, Россия ҳарбийларининг Украинадаги амалиёти туфайли уларга тайёргарлик тезлаштирилганини маълум қилди.
Машқлар Финляндиядан Шимолий Македониягача бўлган қатор мамлакатларда ўтказилиши режалаштирилган, уларда НАТО давлатларидан ўн минглаб ҳарбий хизматчилар ва Бирлашган экспедиция кучлари (ташкилот 2014 йилда тузилган, унинг таркибига Буюк Британия, Дания, Эстония, Финляндия, Исландия, Латвия, Литва, Нидерландия, Норвегия ва Швеция киради) қатнашади.
Британиялик генерал-лейтенант Ралф Вуддиснинг айтишича, Британия «Европа мудофааси ва Россия агрессиясининг олдини олишга катта ҳисса қўшмоқда». Буюк Британия мудофаа вазири Бен Уоллес «Европа хавфсизлиги ҳар қачонгидан ҳам муҳимроқ», деб таъкидлади.
28 апрель куни Польша май ойида ҳарбий машғулотлар ўтказишини, шу сабабли Россиянинг Калининград вилояти билан чегарадош Вармия-Мазурия вилоятидаги трасса ва мамлакатнинг бошқа ҳудудларидаги йўналишларда ҳарбий техника юкланган карвонларнинг «тирбанд ҳаракати» юзага келишини маълум қилди. Фуқаролардан хавфсизлик нуқтаи назаридан ҳарбий объектлар акс этган суратларни тарқатмаслик сўралган.
18 апрель куни Латвияда НАТО бўлинмалари иштирокида машғулотлар бошланганди. Namejs-2022 манёврлари 27 майга қадар ўтказилади, уларга 3 мингга яқин ҳарбий хизматчилар жалб этилади.
Изоҳ (0)