Украинада Россия босқини икки ойдан буён давом этмоқда. Россия Мудофаа вазирлиги ҳозир қўшинларининг бош мақсади — «Донбасс ва Жанубий Украина устидан тўлиқ назорат ўрнатиш» экани ҳақида расман баёнот берган. Meduza’нинг Кремлга яқин манбалари маълум қилишича, ушбу «тўлиқ назорат» ўзини ўзи республика деб эълон қилган Луганск ва Донецк халқ республикаларида Россияга қўшилиш бўйича, босиб олинган Херсонда эса Украинадан мустақиллик бўйича референдум ўтказиш кабиларни назарда тутади.
Meduza’нинг Россия президенти маъмуриятига яқин уч манбаси май ойи ўрталарида ДХР ва ЛХРда Россия таркибига қўшилиш бўйича референдумлар ўтказилиши мумкинлигини маълум қилди. Икки суҳбатдош ҳатто бўлажак референдумлар санасини ҳам очиқлади — 2022 йилнинг 14 ва 15 май кунлари. Тахминларга кўра, республикалар Россия томонидан 21 февраль куни тан олинган чегаралар доирасида, яъни Украинанинг Донецк ва Луганск вилоятларининг «тарихий» чегаралари билан (Киев ҳали у ердаги кўплаб йирик аҳоли пунктларини назорат қилади) расман қўшилиши мумкин.
Худди шу саналарда Россия томонидан қисман босиб олинган Херсон вилоятида ҳам референдум ўтказилиши мумкин, деди манбалар. Ҳудуднинг Украинадан мустақиллиги ҳамда ДХР ва ЛХР моделида Херсон Халқ Республикасини ташкил этиш масаласини овозга қўйиш режалаштирилган. Келажакда у ҳам Россияга қўшилиши мумкин, деб ҳисоблайди нашр суҳбатдошлари.
Шу билан бирга, Meduza манбаларининг қайд этишича, референдумлар аввалига апрель ойининг охирига белгиланган, бироқ Россия армиясининг фронтдаги муваффақиятсизликлари туфайли бир неча бор ортга сурилган. Суҳбатдошларнинг таъкидлашича, худди шундай сабабга кўра саналар яна ўзгариши мумкин.
Meduza’нинг Кремлга яқин манбаларининг таъкидлашича, президент маъмурияти расмийлари Россия «депрессив ҳудудлар»ни аннексия қилиши кераклигига ишонмайди, бироқ бу «олий раҳбарият», яъни президент Владимир Путиннинг шахсий хоҳиши.
ЛХР ва ДХР маъмурияти ушбу хабарларга изоҳ бермаган. Март ойида ДХР раҳбари Денис Пушилин ва ЛХР раҳбари Леонид Пасечник бундай референдумлар ҳақиқатан ҳам режалаштирилганини, аммо уруш тугаганидан кейин ўтказилишини айтганди.
Изоҳ (0)