Грузия бош вазири Иракли Гарибашвили мамлакат собиқ президенти Михаил Саакашвилини 2021 йил кузида Украинадаги низога қўшимча равишда Россия билан тўқнашувларнинг «иккинчи фронти»ни тузиш учун ортга қайтганликда айблади.
«Саакашвили нима учун Грузияга қайтди? Шубҳасиз, мамлакатда уруш ўчоғини ташкил қилиш учун қайтган. Qandай чиркин провокациялар, фитналарнинг олди олинганини тасаввур қиляпсизми?» — дея грузиялик сиёсатчининг сўзларини келтирган «Радио Свобода».
Гарибашвили Грузия ҳукуматида Украинадаги уруш 2021 йил ноябрь ёки декабрь ойларида бошланишининг эҳтимоли мавжуд бўлгани ҳақида ахборотлар борлигини қўшимча қилди.
«Саакашвили айнан шу мақсадда келганди, яъни шу ердан туриб, урушнинг иккинчи фронтини ташкил қилмоқчи эди. Афсуски, ушбу маълумотларни Украинадаги дўстларимиз ҳам тасдиқлаган»,— дейди грузиялик сиёсатчи.
У Украина раҳбариятидаги айнан қайси манбалар бу ҳақида тегишли ахборотларни тақдим этганига, Тбилиси маълумотларини тасдиқлаганига аниқлик киритмади.
Шунингдек, Грузия бош вазири Саакашвили раҳбарлик курсисига қайтганида яна уруш кузатилиши, мамлакатда иккинчи Мариупол бўлишининг эҳтимоли ошиши ҳам ҳеч гап эмаслигини таъкидлаган.
Михаил Саакашвили Грузияга 2021 йил октябрь ойида 8 йиллик танаффусдан кейин қайтганди. У мамлакатга келган кунининг ўзида ҳибсга олинган, кейинчалик бизнесмен ва депутат Валерий Гелашвилини 2005 йилда ургани учун олти йилга қамалган. Сиёсатчи бир неча марта Украинани қўллаб-қувватлаб чиқиш қилди ва Грузия ҳукуматидан ўзини Россия билан низо вақтида Киевга юборишни сўраган.
Киев ҳам Грузияни Россияга қарши ғарб санкцияларига қўшилмагани учун бир неча марта танқид қилган. Бундан ташқари, 25 апрелда Украина президентининг партияси «Халқ хизматкори»нинг парламент фракцияси раҳбари Давид Арахамия ғарб мамлакатларига мурожаат қилиб, Грузия собиқ бош вазири, мамлакатдаги ҳукмрон партия «Грузия орзуси»нинг асосчиси — Бидзина Иванишвилига нисбатан санкциялар қўллашни сўраган.
Изоҳ (0)