Сенатнинг 25-ялпи мажлисида «Кўп квартирали уйларни бошқариш тизими такомиллаштирилаётганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун кўриб чиқилди. Бу ҳақда «Дарё» мухбири хабар берди.
Мажлисда сўнгги беш йил давомида кўп квартирали уй-жой фондини сақлаб туриш ва улардан фойдаланиш соҳасида жами 37 мингдан ортиқ кўп квартирали уйлардан фойдаланишнинг техник хавфсизлик қоидаларига риоя этилишини ўрганиш натижалари бўйича маълумот берилди.
Такидланишича, 61 мингдан ортиқ ҳолатда кўчмас мулк эгалари томонидан уй-жой фонди ва унга туташ ҳудудларда ўзбошимчалик билан қурилмалар барпо этилганлиги аниқланган.
Ноқонуний қурилмаларни мажбурий тартибда бартараф этишга оид судларга аризалар тақдим этишда олдиндан давлат божи тўловини амалга ошириш белгиланганлиги туфайли ушбу мазмундаги материалларни судларга тақдим этишда бир қатор қийинчиликларни келтириб чиқарган.
Муҳокамалар давомида сенаторлар томонидан амалдаги қонунчиликда уй-жой мулкдорлари ширкатлари кўп квартирали уйга туташ ер участкасини ободонлаштириш бўйича ҳамда аҳолига бошқа хизматлар кўрсатилган ва ишлар бажарилган тақдирда, хизматлар кўрсатиш учун тегишли солиқ тўловларидан озод этилган бўлиб, бошқарув ташкилотлари фаолиятига нисбатан ушбу имтиёзлар татбиқ этилмаётганлиги турли келишмовчиларни юзага келтирилиши қайд этилди.
Ушбу қонун билан «Маъмурий жавобгарлик тўғрисида»ги кодексга, «Солиқ кодекс»га, «Давлат божи тўғрисида»ги қонунга ўзгартиш ва қўшимчалар киритилмоқда.
Мазкур қонуннинг ҳаётга татбиқ этилиши натижасида коммунал хизмат кўрсатиш соҳасида, шу жумладан кўп квартирали уйларни сақлаш ва ундан фойдаланишда қонун бузилиш ҳолатларини олдини олишга ҳамда аҳолининг хавфсиз яшашига шароит яратиб берилишига эришилади.
Шу билан бирга аҳоли пунктларининг архитектура қиёфасини яхшилаш ва аҳолининг турмуш даражасини кўтариш имконияти яратилади.
«Киритилаётган ўзгартиришлар – берилаётган имкониятлар, имтиёзлар, ваколатлар, чекловлар замирида биринчи навбатда аҳоли манфаатлари ётибди. Кўп квартирали уйлар номи билан кўпчилик оилалар яшайдиган уйлар. Бир хонадондаги ўзгариш (деворларни бузиш, кенгайтириш, биринчи қаватдагилар қўшимча иморатлар солиши ва ҳ.к.) бошқа хонадонларга таъсир қилмай қолмайди. Бефарқлик, масъулиятсизлик ва назоратсизлик сабабли мазкур масала кўп вақт эътибордан четда қолгани ҳам ҳақиқат.
Энди аниқ жавобгарлик белгиланмоқда: мансабдорга ҳам, жисмоний шахсга ҳам. Ҳозир кўп қаватли уйларга хизмат кўрсатиш тизимида бошқарув компаниялари оммалашмоқда. Лекин, улар ҳали аҳолининг ишончини тўла оқлаётгани йўқ. Муаммо етарлича (асосан маблағ билан боғлиқ).
Ушбу қонун билан уларга солиқ имтиёзлари берилаётгани амалда уларнинг молиявий ҳолати яхшиланиши ва пировардида хизмат кўрсатиш сифати ошишига хизмат қилади.
Қонуннинг мазмун моҳиятини (имзоланганидан сўнг) аҳоли ўртасида кенг тарғиб қилишга барча имкониятлар сафарбар қилиниши керак.
Негаки, сенаторимиз жуда тўғри масалани кўтарди, уй-жой эгалари айбсиз айбдор бўлиб қолмасликлари керак. Имконият бўлиши керак. Ҳуқуқни қўллаш амалиётида бунга алоҳида эътибор қаратиш талаб этилади». – деди Сенат раиси Танзила Норбоева
Қонун сенаторлар томонидан маъқулланди.
Изоҳ (0)