Senatning 25-yalpi majlisida “Ko‘p kvartirali uylarni boshqarish tizimi takomillashtirilayotganligi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun ko‘rib chiqildi. Bu haqda “Daryo” muxbiri xabar berdi.
Majlisda so‘nggi besh yil davomida ko‘p kvartirali uy-joy fondini saqlab turish va ulardan foydalanish sohasida jami 37 mingdan ortiq ko‘p kvartirali uylardan foydalanishning texnik xavfsizlik qoidalariga rioya etilishini o‘rganish natijalari bo‘yicha ma’lumot berildi.
Takidlanishicha, 61 mingdan ortiq holatda ko‘chmas mulk egalari tomonidan uy-joy fondi va unga tutash hududlarda o‘zboshimchalik bilan qurilmalar barpo etilganligi aniqlangan.
Noqonuniy qurilmalarni majburiy tartibda bartaraf etishga oid sudlarga arizalar taqdim etishda oldindan davlat boji to‘lovini amalga oshirish belgilanganligi tufayli ushbu mazmundagi materiallarni sudlarga taqdim etishda bir qator qiyinchiliklarni keltirib chiqargan.
Muhokamalar davomida senatorlar tomonidan amaldagi qonunchilikda uy-joy mulkdorlari shirkatlari ko‘p kvartirali uyga tutash yer uchastkasini obodonlashtirish bo‘yicha hamda aholiga boshqa xizmatlar ko‘rsatilgan va ishlar bajarilgan taqdirda, xizmatlar ko‘rsatish uchun tegishli soliq to‘lovlaridan ozod etilgan bo‘lib, boshqaruv tashkilotlari faoliyatiga nisbatan ushbu imtiyozlar tatbiq etilmayotganligi turli kelishmovchilarni yuzaga keltirilishi qayd etildi.
Ushbu qonun bilan “Ma’muriy javobgarlik to‘g‘risida”gi kodeksga, “Soliq kodeks”ga, “Davlat boji to‘g‘risida”gi qonunga o‘zgartish va qo‘shimchalar kiritilmoqda.
Mazkur qonunning hayotga tatbiq etilishi natijasida kommunal xizmat ko‘rsatish sohasida, shu jumladan ko‘p kvartirali uylarni saqlash va undan foydalanishda qonun buzilish holatlarini oldini olishga hamda aholining xavfsiz yashashiga sharoit yaratib berilishiga erishiladi.
Shu bilan birga aholi punktlarining arxitektura qiyofasini yaxshilash va aholining turmush darajasini ko‘tarish imkoniyati yaratiladi.
“Kiritilayotgan o‘zgartirishlar – berilayotgan imkoniyatlar, imtiyozlar, vakolatlar, cheklovlar zamirida birinchi navbatda aholi manfaatlari yotibdi. Ko‘p kvartirali uylar nomi bilan ko‘pchilik oilalar yashaydigan uylar. Bir xonadondagi o‘zgarish (devorlarni buzish, kengaytirish, birinchi qavatdagilar qo‘shimcha imoratlar solishi va h.k.) boshqa xonadonlarga ta’sir qilmay qolmaydi. Befarqlik, mas’uliyatsizlik va nazoratsizlik sababli mazkur masala ko‘p vaqt e’tibordan chetda qolgani ham haqiqat.
Endi aniq javobgarlik belgilanmoqda: mansabdorga ham, jismoniy shaxsga ham. Hozir ko‘p qavatli uylarga xizmat ko‘rsatish tizimida boshqaruv kompaniyalari ommalashmoqda. Lekin, ular hali aholining ishonchini to‘la oqlayotgani yo‘q. Muammo yetarlicha (asosan mablag‘ bilan bog‘liq).
Ushbu qonun bilan ularga soliq imtiyozlari berilayotgani amalda ularning moliyaviy holati yaxshilanishi va pirovardida xizmat ko‘rsatish sifati oshishiga xizmat qiladi.
Qonunning mazmun mohiyatini (imzolanganidan so‘ng) aholi o‘rtasida keng targ‘ib qilishga barcha imkoniyatlar safarbar qilinishi kerak.
Negaki, senatorimiz juda to‘g‘ri masalani ko‘tardi, uy-joy egalari aybsiz aybdor bo‘lib qolmasliklari kerak. Imkoniyat bo‘lishi kerak. Huquqni qo‘llash amaliyotida bunga alohida e’tibor qaratish talab etiladi”. – dedi Senat raisi Tanzila Norboyeva
Qonun senatorlar tomonidan ma’qullandi.
Izoh (0)