Қашқадарё вилоятининг Қарши шаҳрида журналист Дилшод Набиев ИИБ ходимлари томонидан мажбурий тарзда олиб кетилгани айтилмоқда. Бу ҳақда журналистнинг ўзи хабар берган.
Маълум қилинишича, Nasafnews сайти мухбирлари ишлаётган офисга ИИВ ва терроризмга қарши кураш бошқармасида ишлашини айтган ходимлар бостириб кирган ва Дилшод Набиевни ҳеч қандай огоҳлантиришсиз, мажбурий тарзда олиб кетган.
Бу ҳақда хабар берган блогер Капитан Каримовнинг ёзишича, ўзини ИИБ ходимлари сифатида таништирганлар журналистнинг олиб кетилиши сабабини ошкор қилмаган. Бунга етарлича асос ҳам кўрсатмаган.
Автоблогер Мақсуд Музаффаров журналист вилоят ҳокимлиги биносига олиб кетилаётганини ёзмоқда.
Ички ишлар вазирлиги ахборот хизмати Шоҳруҳ Ғиёсов мазкур масалага эътибор қаратиб, ИИБ ходимларининг сайт офисига бостириб кирганини рад этган ҳолда «Сайт мухбири вилоят ҳокимиятига суҳбатга таклиф этилган, холос. Ижтимоий тармоқ фаолларидан корпоратив этикани қурол қилиб, ёлғон маълумотларни тарқатишдан тийилишларини сўраймиз», — деди.
«Дарё» мухбири суҳбатлашган Дилшод Набиев ИИБ ходимлари у ишлаётган хонага дабдурустдан кириб келганини, ҳатто ўзини ҳам таништирмасдан, уни вилоят ҳокимлигига олиб кетишмоқчи бўлганини айтган.
«Мен эса сабабини билмасдан вилоят ҳокимлигига ҳам, бошқа жойга ҳам бормайман, дедим. Шунда улар хонамдан чиқиб кетишди. Сўнг вилоят ҳокимлиги ахборот хизмати раҳбари телефон қилиб, суҳбатга чақирилаётганимни айтди. Борсам, ички ишлар вазири ўринбосари билан учраштиришди. Вазир ўринбосари Саидкарим Нишонбоев сўнгги йилларда қишлоқ хўжалиги соҳасида кўплаб ишлар амалга оширилаётганини айтиб, нотўғри ахборот тарқатиш жавобгарликка сабаб бўлишини билдирди», — дейди Дилшод Набиев.Журналистнинг қўшимча қилишича, вазир ўринбосари унга гапираётганда Шуҳрат Ғаниевнинг туман ҳокимларини ҳақорат қилгани ҳақидаги материалига урғу берган.
«Аввалроқ бош вазир ўринбосари Шуҳрат Ғаниевнинг вилоятдаги туман ҳокимларини ҳақорат қилган бўлиши мумкинлигини ёзиб, бу ҳақда катта мақола беришимизни эълон қилгандик. Энди бу мақолам чиқмаса керак», — дейди журналист.
Изоҳ (0)