Ўзбекистон ташқи олтин бозорида Россия билан рақобатлашишни режалаштирмаяпти. Бу ҳақда Шуҳрат Вафоевга таяниб, «РБК» маълум қилди.
2021 йилда Ўзбекистон ва Россия қимматбаҳо металлар экспорти бўйича жаҳон етакчилари қаторидан жой олган. Санкциялар туфайли Россиянинг олтин қазиб олувчи компаниялари ўз маҳсулотларини сотишда муаммоларга дуч келмоқда.
«Олтин бозори жуда ўзига хос. Биз сотганимиздан ҳам кўпроқ олтин ишлаб чиқарамиз. Бугунги кунда Ўзбекистонда қазиб олинаётган олтин тўлиқ Марказий банки томонидан сотиб олинади ва олтин валюта захираларининг бир қисми ҳисобланади. Яъни маркетинг ва мақсадли равишда йирик олтин бозорида ўз ўрнини эгаллашга ҳаракат қилиш деган нарса йўқ», — деди Вафоев.
Ўзбекистонда йилига 100 тоннага яқин олтин қазиб олинади. Шу билан бирга, мамлакат Марказий банкига барча маҳаллий тозаланган олтинни сотиб олишда устувор ҳуқуқ берилган. Олтин маҳаллий Марказий банк халқаро захираларининг қарийб 60 фоизини ташкил қилади.
2020 йилда Ўзбекистон олтин экспортининг деярли 92 фоизи ушбу қимматбаҳо металл бўйича энг йирик халқаро савдо маркази Буюк Британияга тўғри келган. 7 фоизи эса (483 млн доллар) Россияга сотилган.
Ўзбекистон Россия билан бир қаторда олтин экспорт қилувчи етакчи ўнталикка киради. Ўтган бир неча ой ичида эса республика энг кўп олтин сотувчига айланади. Жаҳон олтин кенгаши маълумотларига кўра, бу 2022 йил февраль ойида содир бўлган.
Аввалроқ Ўзбекистондаги Мурунтов олтин кони 2021 йилда ҳам дунёдаги энг кўп олтин ишлаб чиқарган кон бўлгани ҳақида хабар берилган эди.
Изоҳ (0)