Банклар, IТ ва саноат: Ўзбекистоннинг энг юқори ойлик тўланадиган соҳалари эълон қилинди

Жорий йилнинг январь—март ойларида иқтисодий фаолият турлари бўйича ўртача иш ҳақи миқдорлари маълум қилинди. Бу ҳақда Давлат солиқ қўмитаси хабар берди.

Иқтисодий фаолият турлари бўйича ўртача ойлик иш ҳақининг энг баланд кўрсаткичи — банк, суғурта, лизинг ва кредит воситачилик соҳаларига тўғри келади (8,4 млн сўм).

Ахборот ва алоқа соҳасида ўртача ойлик иш ҳақи 6,5 млн сўмга тенг бўлган бўлса, ташиш ва сақлаш соҳасида бу қиймат 4,5 млн сўмни ташкил этади.

Саноат соҳасида ўртача ҳисобланган номинал иш ҳақи ўтган йилга нисбатан 800 мингга ўсиб, 4,4 млнни ташкил қилмоқда.

Қурилиш соҳасида бу маблағ 4,1 млн сўмга тенг ҳисобланган бўлса, савдода ўртача ҳисобланган иш ҳақи — 3,5 млн сўм.

Соҳалар бўйича таълим ва соғлиқни сақлаш тизимида энг кам ўртача ойлик иш ҳақи тўланади.

2022 йилнинг I чорагида таълим соҳаси учун ўртача ойлик иш ҳақи — 2,5 млн сўм ҳисобланган. Соғлиқни сақлаш ва ижтимоий хизматлар кўрсатишда бу қиймат 2,3 млн сўмга тенг деб белгиланган.

Аввалроқ 2022 йилнинг ўтган даврида ўртача ойлик иш ҳақи қанча бўлгани ҳақида хабар берилган эди.