«Манчестер Юнайтед»ни тарк этиши кутилаётган Пол Погбага учта топ-клубдан қизиқиш бор

Пол Погба «Манчестер Юнайтед» билан шартномаси якунига етгач, қайси клубга ўтиш борасида бир қарорга келмаган.

The Telegraph нашрининг хабар беришича, ярим ҳимоячи ҳозирча бирорта жамоадан расмий таклиф олмаган. Январь ойидан бошлаб футболчида бошқа жамоалар билан музокаралар олиб бориш ҳуқуқи бор эди, аммо Погба бу ишни «Манчестер Юнайтед» билан мавсумни якунлагандан кейин қилмоқчи.

Мавсум якунлангач, Погба унга қизиққан жамоалар билан музокараларни бошлайди. «Барселона», «Реал» ва «Ювентус» франциялик футболчи билан дастлабки музокараларни олиб боришни режалаштирмоқда. Пол барча таклифларни тинглаб, сўнгра якуний қарор қабул қилиши кутилмоқда.

Погба 2016 йилдан буён «Манчестер Юнайтед» шарафини ҳимоя қилади. Жорий мавсум ярим ҳимоячи манкунианликлар сафида 27 та ўйинда иштирок этиб, битта гол ва 9 та голли узатмага муаллифлик қилди.