Антонио Конте «ПСЖ»да Маурисио Почеттинонинг ўрнини эгаллаши мумкин

«Тоттенҳэм» бош мураббийи Антонио Конте фаолиятини «ПСЖ»да давом эттириши мумкин.

Журналист Абдулла Булманинг хабар беришича, италиялик мутахассис «ПСЖ» раҳбариятига Маурисио Почеттинонинг ўрнини эгаллашга тайёрлигини билдирган.

Конте парижликлар олдига бир нечта шартлар қўйган. У клубдаги трансфер сиёсатини тўлиқ назорат қилишни, «Рома» ва «Торино»да спорт директори лавозимида ишлаган Жанлука Петракини олиб келинишини хоҳламоқда. Ундан ташқари Конте ўзи билан бирга мураббийлар штабини ҳам олиб келмоқчи.

Италиялик мураббий парижликлар билан 2 йиллик шартнома имзолашни истамоқда.

«ПСЖ» раҳбарияти Почеттинонинг ишларидан норози. 49 ёшли мутахассис қўл остида жамоа Франция Кубоги нимчорак финалида «Ницца»га имкониятни бой бериб, мусобақа билан хайрлашди, Чемпионлар Лигаси 1/8 финалида эса «Реал»га мағлуб бўлди.

Аввалроқ, «ПСЖ» Почеттинонинг ўрнига Диего Симеонени олиб келмоқчи эканлигини хабар қилинганди. Шунингдек, «Реал» собиқ устози Зинедин Зидан ҳам Париж клубида иш бошлаши мумкинлиги айтилганди.

Эслатиб ўтамиз, «ПСЖ» Франция чемпионатининг 34-турига келиб, чемпионликни муддатидан аввал ҳал қилиб қўйди.