АҚШнинг Озиқ-овқат ва фармацевтика идораси (FDA) 12 ёшгача бўлган болалар учун COVID-19 ни даволашда қўлланиладиган препаратни тасдиқлади. Бу ҳақда FDA сайтида айтилган.
АҚШ регулятори «Ремдесивир» номи билан ҳам танилган Веклури препаратини 12 ёшгача бўлган болалар учун COVID-19 дан биринчи даволаш воситаси сифатида тасдиқлади.
Эндиликда «Ремдесивир»ни барча болаларга, шу жумладан 28 кунлик ва вазни камида 3 килограмм бўлган янги туғилган чақалоқларга, енгил ва ўрта даражадаги, оғирлашиш эҳтимоли юқори бўлган COVID-19 ни даволаш учун қўллаш мумкин.
«COVID-19 болаларда оғир касалликларга олиб келиши мумкинлиги ва улардан баъзиларини ҳозирда эмлаш имкони йўқлиги сабаб аҳолининг ушбу гуруҳи учун коронавирусни хавфсиз ва самарали даволаш усулларига ҳануз эҳтиёж бор», — деди FDA’нинг даволаш ва баҳолаш маркази директори Патрисия Кавацони.
Таъкидланишича, ҳозиргача Веклури фақат катта ёшлиларнинг айрим тоифалари, 12 ёш ва ундан катта беморларни даволаш учун тасдиқланган. Препарат COVID-19 га қарши вакцина ва бустер дозалар тавсия этилган кишиларда вакцинациянинг ўрнини боса олмайди.
Аввал Жаҳон соғлиқни сақлаш ташкилотининг Иммунизация бўйича экспертлар стратегик маслаҳат гуруҳи (САГЕ) 5-11 ёшли болалар учун Pfizer/BioNTech вакцинасидан фойдаланишни маъқуллаган эди.
Изоҳ (0)