Украинадаги ҳукмрон партия «Халқ хизматкори» парламент фракциясининг раҳбари Давид Арахамия ғарб мамлакатларига мурожаат қилиб, Грузия собиқ бош вазири, айни вақтда мамлакатда ҳукмрон «Грузин орзуси» партиясининг асосчиси Бидзина Иванишвилига қарши санкциялар қўллашни сўрамоқчи. Бу ҳақда «Коммерсантъ» хабар берди.
Россия билан тинчлик музокараларида Украина делегациясига раҳбарлик қилаётган Арахамия олигарх Иванишвилининг Россия сиёсатидаги юқори мартабали амалдорларга алоқаси бор деб ҳисобланмоқда. Арахамия ўз тахминларига исбот сифатида «Система» компанияси директорлари кенгаши собиқ раҳбари Евгений Евтушенконинг Бидзина Иванишвилини туғилган куни билан табриклаган аудиоёзуви интернетда тарқалганини қайд этган.
«Бугун Иванашвили Грузия Януковичига (Украина собиқ президенти) айланган. У ва унинг одамлари Украина борасида сиёсат олиб бормоқда ва грузин халқи бунга рози эмас. Улар келгуси 10 йилликда грузинларни украиналиклар билан уруштиришни мақсад қилган»,— дея таъкидлаган Давид Арахамия.
Украиналик сиёсатчи мазкур таклифи орқали мамлакат президенти Владимир Зеленскийнинг бир неча марта Тбилиси ҳукуматининг Россияга қарши санкциялар қўлламагани учун танқид қилганини назар тутган бўлиши мумкин. Шунингдек, Киев Грузияда кўнгиллиларнинг Украинадаги урушга боришига қўйилган тақиқдан норози бўлган. Бундан ташқари, Украина кучишлатар тузилмалари (жумладан, ҳарбий разведка) Грузияни Россияга қурол-яроғ, яъни ҳарбийлар тунда фойдаланиши мумкин бўлган жиҳозларни етказиб берганликда айблаган.
Аввалроқ Зеленский Россия фуқароларининг Грузияда эркин ҳолда банк ҳисоб рақамларини очаётгани ва ўз компанияларини рўйхатдан ўтказаётганига салбий муносабат билдирганди.
Эслатиб ўтамиз, 2021 йил охирида миллиардер Иванишвили сиёсатдан тўлиқ кетишини эълон қилган ва «Грузин орзуси» партияси фаолиятидан ҳам узоқлашганди. Партия етакчилари ҳали Давид Арахамиянинг таҳдидларига расмий жавоб қайтаргани йўқ.
Nation.ге ахборот-таҳлил ресурсининг эксперти Давид Авалишвили украиналик сиёсатчининг ушбу баёноти ҳеч нимани ўзгартирмаслигини таъкидлади.
«Бидзина Иванашвили — Франция фуқароси; у Францияда коронавирусга қарши чора-тадбирлардаги иштироки ва Париждаги Нотр-Дам ибодатхонасини қайта таъмирлашга 80 миллион евро ажратгани учун Фахрий легион ордени билан мукофотланган. Франция ўз фуқароларини, хусусан, республика учун фойдали одамларни ҳеч қачон ҳеч кимга хафа қилдириб қўймайди»,— деган Авалишвили.
Изоҳ (0)