Тошкент вилояти Бўстонлиқ туманида 24 апрель куни Фавқулодда вазиятлар вазирлиги қутқарувчилари сувда тиқилиб қолган автомобиль ҳайдовчисига амалий ёрдам кўрсатди. Бу ҳақда ФВВ ахборот хизмати хабар қилди.
Қайд этилишича, шу куни соат 21:10 ларда Тошкент вилояти ФВБга Бўстонлиқ тумани Боймирзаев қишлоғида кучли ёғингарчилик кузатилгани, шу сабаб ушбу ҳудуддан оқиб ўтувчи Паркент каналига сув сиғмай, автомобиль йўлига тошиб чиққани ҳақида хабар келиб тушган. Кучли оқим йўлдаги Cobalt автомобилини суриб йўлнинг четига чиқариб юборган.
Воқеа жойига Тошкент вилояти ФВБ Чимён ёнғин-қутқарув отряди қутқарувчилари етиб борган. Олиб борилган тезкор амалий ҳаракатлар натижасида автомобиль ҳамда унинг ичида бўлган 4 нафар фуқаро қутқарилиб, хавфсиз ҳудудга олиб чиқилган.
Ҳодиса оқибатида тан жароҳати олганлар йўқ.
Изоҳ (0)