Қашқадарё вилоятининг Нишон туманида эски мактаб биносини бузишга рухсат бериш учун тадбиркордан пора талаб қилган бош мутахассис қўлга олинди, деб хабар беради Бош прокуратура ҳузуридаги департамент.
Маълум қилинишича, департамент, ДХХ ва ИИБнинг Қашқадарё вилояти бошқармалари томонидан тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган. Тадбирда Нишон тумани Халқ таълими бўлими махсус таъмирлаш эксплуатация хизмати бош мутахассиси Ж.И. тумандаги 2-сонли мактабнинг эски биносини бузиб олиш ишларини олиб бориш учун бўлим мудири орқали «ҳамкорлик» шартномаси расмийлаштириб бериши эвазига «Қ.Т.» МЧЖ раҳбаридан 5 400 АҚШ доллари пора талаб қилгани аниқланган. У келишилган пулни олаётган вақтида ашёвий далиллар билан ушланган.
Мазкур ҳолат юзасидан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари ўтказилмоқда.
Аввалроқ «Юнусобод тумангаз» бўлимининг муҳандиси тадбиркордан пора олаётганда қўлга тушгани, Самарқандда туман ҳокимининг сохта қарори билан қарийб 20 минг долларга ер сотган хўжалик раҳбари аниқлангани, Хоразмда пул эвазига фуқароларга субсидия асосида уй олиб беришни ваъда қилган банк кассири ушлангани тўғрисида хабар берилганди.
Мавзуга доир:
Изоҳ (0)