Андижон вилоятининг Марҳамат, Қўрғонтепа ҳамда Андижон шаҳридаги маҳаллада фаолият юритувчи раислар бир ҳафта дам олиш мақсадида Дубайга юборилади. Бу ҳақда вилоят туризм ва маданий мерос бошқармасига таяниб, «Дарё» мухбири хабар берди.
Қайд этилишича, уч ой давомида аҳолини пиёда юришга мажбур қилган Андижон шаҳрининг 4-сон, Қўрғонтепа туманининг «Янги бўстон» ва Марҳамат туманининг «Бобохуросон» маҳалласи раислари — Табассумхон Исроилова, Набижон Режапов ҳамда Таваккул Шомуродовлар бир ҳафталик саёҳат учун Дубай шаҳрига жўнаб кетади.Андижон вилояти ҳокими Шуҳрат Абдураҳмонов 2021 йил декабрда қанча пул кетса ҳам одамларни юргизишини маълум қилиб, «Эрталаб ва кечқурун пиёда юришни ташкил қилган маҳалла раислари ва ташкилот раҳбарларини Дубайга юбораман», деганди.
Вилоят ҳокимининг мазкур ваъдасидан келиб чиққан ҳолда ҳудудда одамларнинг пиёда юриш ҳолати ўрганиб чиқилган. «Саломатлик учун 5000 қадам» шиори остида ҳар куни эрталаб ва кечқурун пиёда юриш тадбирларини ўтказиб келган 16 та маҳалла фуқаролар йиғини аниқланиб, ушбу маҳаллаларнинг ҳар биридан 10 нафардан, жами 160 нафар саломатлик тарғиботчилари рўйхати шакллантирилган.
«2022 йилнинг 5- ва 12 февраль куни Андижон ва Хонобод шаҳарлари, Асака, Балиқчи, Шаҳрихон, Қўрғонтепа, Жалақудуқ, Пахтаобод, Избоскан ва Андижон туманларида яшовчи 100 нафар фуқаро Тошкент—Самарқанд—Бухоро йўналиши бўйлаб саёҳатга юборилган. Энди МФЙ раисларининг хорижга кетиш масаласи ҳал этилади», — дейди вилоят туризм ва маданий мерос бошқармаси вакили.
Изоҳ (0)