Telegram асосчиси Павел Дуров Бирлашган Араб Амирликлари фуқаролигини олган, деб ёзмоқда Forbes бизнесмен ва унинг компаниясига яқин бир қанча манбаларга таяниб.
Манбаларга кўра, Дуров БАА фуқаролигини 2021 йилнинг февралида олган. Тадбиркор 2017 йилдан буён Дубайда истиқомат қилади, у ердаги Dubai Media City эркин иқтисодий зонасида Telegram’нинг бош офиси очилган.
Шундай қилиб, миллиардер бир вақтнинг ўзида тўртта давлат фуқароси ҳисобланади. Шу билан бирга, Forbes манбаларидан бири Дуровнинг Россиядан олган паспорти муддати аллақачон тугаганини айтган. «Павел Россияга бормайди ва саккиз йил давомида бу мамлакатда ҳеч қандай активга эга эмас. Telegram’нинг Россияда офислари ва ходимлари йўқ, россиялик фойдаланувчилар сони эса 8 фоиздан ошмайди», — деди манба.
Павел Дуров 2014 йилда Россиядан кўчиб кетган. Кўп ўтмай, у Кариб денгизидаги Сент-Киц ва Невис давлатлари фуқаролигини олгани маълум бўлди, бу унга дунёнинг аксарият мамлакатларига, жумладан, Европа Иттифоқи ва Буюк Британияга визасиз ташриф буюриш имконини беради. 2021 йил август ойида Дуров Франция фуқаролигини олган.
2022 йилнинг апрель ойида Павел Дуров Американинг Forbes журналидан уни россиялик миллиардер деб атамасликни сўради. Энг бой россияликларнинг янги рейтингида эса Telegram асосчиси 15,1 миллиард доллар бойлиги билан учинчи ўринни эгаллаб турибди.
Изоҳ (0)