Telegram asoschisi Pavel Durov 10-oktabr kuni 37 yoshni qarshi oldi. O‘sha kuni u dunyoda yetarlicha qadrlanmaydigan va aksincha, ortiqcha baho berib yuboriladigan narsalar ro‘yxatini tuzib, Telegram kanalida e’lon qildi.

Foto: Reuters

Durovning so‘zlariga ko‘ra, yetarlicha baholanmaydigan uchta narsa — bu uyqu, tabiat va yolg‘izlik. Durovning ta’kidlashicha, uyqu “immunitetni, ijodkorlikni va psixologik farovonlikni oshiradi”, yolg‘iz qolish esa insonga “ma’naviy va intellektual yutuqlarga erishish erkinligini beradi”.

Telegram asoschisi tabiatni “insonlar biologik tarzda yaratilgan va o‘zini yaxshi his qiladigan muhit” deb ta’rifladi.

Durovning ortiqcha baholab yuboriladigan narsalar ro‘yxati quyidagilarni o‘z ichiga oladi:

  • katta shaharlar (Durovning so‘zlariga ko‘ra, ular ifloslanish, jinoyatchilik va shovqin manbayi);
  • restoranlar (eng sekin va eng kam samarali ovqatlanish usuli);
  • issiq ob-havo (xatti-harakatlarda lanjlikka, odamlarning tez qarishiga olib keladi);
  • moda (doimiy o‘zgarib turadigan tendensiyalarni kuzatib borish istagi qimmat va keraksizdir);
  • ko‘chmas mulk (ko‘chmas mulk sotib olayotgan odamlarning ko‘chib yurish erkinligi cheklangan bo‘ladi);
  • ijtimoiy tarmoqlar (ijtimoiy tarmoqlardagi “uzluksiz chiqindilar oqimi” ijodkorlikni pasaytiradi);
  • taniqli kishilarning maslahatlari (soha mutaxassisi bo‘lmagan odamlarning fikriga emas, balki aniq fanga tayanish kerak).

Pavel Durov o‘z ijtimoiy tarmoqlarida turli falsafiy mavzularda so‘z yuritilgan postlarni muntazam joylab turadi. Avvalgi tug‘ilgan kunida Durov keksayishga qarshi kurashishning yetti usulini sanagandi. Ular orasida spirtli ichimliklar, go‘sht va ortiqcha ovqatlanishdan voz kechish, tabiatan jismoniy zo‘riqish, stressli vaziyatlarni chetlab o‘tish haqida gapirgandi. U, shuningdek, ko‘p uxlash va “yolg‘iz yashash”ning muhimligini ta’kidlagan.

Mavzuga doir: