Австралия 147 нафар россияликни санкциялар рўйхатига киритди. Россия президенти Владимир Путиннинг қизлари деб тахмин қилинадиган Мария Воронцова ва Катерина Тихонова, шунингдек, Россия ташқи ишлар вазирининг қизи Екатерина Винокурова санкциялар остига тушди. Қолган 144 киши Федерация Кенгашининг аъзоларидир. Бу ҳақда Австралия ташқи ишлар ва савдо вазирлиги маълум қилди.
Мазкур россияликларга Австралияга кириш тақиқланади, уларнинг активлари музлатилади ва мамлакатда ҳар қандай молиявий операцияларни амалга ошириши тақиқланади.
Аввалроқ Канада Россияга қарши санкциялар рўйхатини кенгайтириб, Путиннинг икки қизи, Лавровнинг оиласи ва россиялик бизнесменларга қарши санкциялар эълон қилганди. Бунга қадар 6 апрелда АҚШ, 8 апрелда Буюк Британия Тихонова ва Воронцовага қарши санкциялар қўллаган.
Аввал Австралия санкциялар рўйхатига Владимир Путин, ташқи ишлар вазири Сергей Лавров ва бошқа россиялик сиёсатчилар ҳамда бизнесменларни киритган эди. Шунингдек, мамлакат Россиянинг бир қатор компанияларига чекловлар қўллаган ва қимматбаҳо маҳсулотлар, алумина ва алюминий рудаларини Россияга экспорт қилишни тақиқлаган. Санкциялар Россиянинг Украинадаги ҳарбий амалиётига жавобан жорий этилган.
Изоҳ (0)