Telegram asoschisi Pavel Durov Birlashgan Arab Amirliklari fuqaroligini olgan, deb yozmoqda Forbes biznesmen va uning kompaniyasiga yaqin bir qancha manbalarga tayanib.
Manbalarga ko‘ra, Durov BAA fuqaroligini 2021-yilning fevralida olgan. Tadbirkor 2017-yildan buyon Dubayda istiqomat qiladi, u yerdagi Dubai Media City erkin iqtisodiy zonasida Telegram’ning bosh ofisi ochilgan.
Shunday qilib, milliarder bir vaqtning o‘zida to‘rtta davlat fuqarosi hisoblanadi. Shu bilan birga, Forbes manbalaridan biri Durovning Rossiyadan olgan pasporti muddati allaqachon tugaganini aytgan. “Pavel Rossiyaga bormaydi va sakkiz yil davomida bu mamlakatda hech qanday aktivga ega emas. Telegram’ning Rossiyada ofislari va xodimlari yo‘q, rossiyalik foydalanuvchilar soni esa 8 foizdan oshmaydi”, — dedi manba.
Pavel Durov 2014-yilda Rossiyadan ko‘chib ketgan. Ko‘p o‘tmay, u Karib dengizidagi Sent-Kits va Nevis davlatlari fuqaroligini olgani ma’lum bo‘ldi, bu unga dunyoning aksariyat mamlakatlariga, jumladan, Yevropa Ittifoqi va Buyuk Britaniyaga vizasiz tashrif buyurish imkonini beradi. 2021-yil avgust oyida Durov Fransiya fuqaroligini olgan.
2022-yilning aprel oyida Pavel Durov Amerikaning Forbes jurnalidan uni rossiyalik milliarder deb atamaslikni so‘radi. Eng boy rossiyaliklarning yangi reytingida esa Telegram asoschisi 15,1 milliard dollar boyligi bilan uchinchi o‘rinni egallab turibdi.
Izoh (0)