Ўзбекистонда 1 июлдан бошлаб айрим лицензия ва рухсатномаларга қўйиладиган индивидуал талаблар бекор қилинади. Бу президент фармони билан белгиланган.
Тиббий фаолият учун лицензия
Мобил иловалардан фойдаланган ҳолда тиббий фаолият соҳасида масофавий тиббий маслаҳатлар ва кўриклар ташкил этишда мулк ҳуқуқи ёки бошқа қонуний асосда тегишли бинолар, жиҳозлар ва инвентарларнинг мавжудлиги тўғрисидаги талаб бекор қилинади.
Фармацевтика фаолияти учун лицензия (дори воситалари ва тиббий буюмларнинг чакана савдоси йўналишида)
Иккита талаб бекор қилинади:
- нархи харидор томонидан тўланадиган дори воситалари ва тиббий буюмлар дорихоналардан олиб етказиб берилганда юридик шахсларнинг штатларида фармацевт бўлиши лозимлиги;
- алоқа воситалари орқали маслаҳат берилганда дори воситалари ва тиббий буюмларни етказиб бериш учун дорихона ходими фармацевтик маълумотга эга мутахассис бўлиши лозимлиги.
Архитектура-шаҳарсозлик ҳужжатларини ишлаб чиқиш фаолияти учун лицензия
Иккита талаб бекор қилинади:
- мулк ҳуқуқи асосида ёки бошқа қонуний асосда тегишли бўлган бинолар, хоналар, асбоб-ускуналар ва жиҳозларнинг мавжуд бўлиши;
- хориждан келган буюртмалар бўйча миллий стандартлар ва талабларга риоя этилиши.
Фискал хотирали назорат-касса машинасини рўйхатга ўтказиш карточкаси
Товарлар, ишлар ва хизматларни реализация қилишда нақд пул маблағларининг ҳисобини юритишда фискал хотирали назорат-касса машиналаридан фойдаланиш учун стационар пунктга эга бўлиш ва хизмат кўрсатувчи банк билан нақд пул тушумларини инкассо қилиш тўғрисида шартнома мавжуд бўлиш талаблари бекор қилинади.
Ўзбекистон Республикаси ҳудудида меҳнат қилиш ҳуқуқини тасдиқлаш
Хорижда туриб масофавий (онлайн) шаклда фаолият кўрсатиш учун Ўзбекистон Республикаси ҳудудида меҳнат фаолиятини амалга ошириш ҳуқуқини берувчи тасдиқнома олиш талаби бекор қилинади.
Заргарлик буюмларини ҳамда қимматбаҳо металлар ва қимматбаҳо тошлардан ясалган ва бошқа буюмларни сотиш фаолиятини бошлаганлик ёки тугатганлик тўғрисида хабарнома
Бу йўналишда интернет-дўкон шаклидаги компаниялар учун мулк ёки бошқа ҳуқуқ асосида тегишли бўлган бино ва иншоотларнинг мавжудлиги тўғрисидаги талаб бекор қилинади.
Аввалроқ Ўзбекистонда 1 июлдан бир қатор солиқ ва божхона имтиёзлари бекор қилиниши ҳақида хабар берилган эди.
Изоҳ (0)