Америка Қўшма Штатлари президенти Дональд Трамп Қримни Украинага қайтаришнинг иложи йўқлигини айтди. АҚШ етакчиси мамлакатнинг НАТОга қўшилиш эҳтимолини ҳам инкор этган. Бу ҳақда Трамп Fox News телеканалига берган интервьюсида айтиб ўтган.
Трампнинг қайд этишича, Киев Шимолий Атлантика альянсига аъзолик билан боғлиқ бўлмаган бошқа хавфсизлик кафолатларини олади.

“Бу иккала нарса ҳам мумкин эмас. Хавфсизликнинг қандайдир кўриниши бўлади. Бироқ бу НАТО бўлиши мумкин эмас. Чунки бу ҳеч қачон бўлмайди”, деган АҚШ президенти.
Дональд Трамп Украина президенти Владимир Зеленскийга музокаралар чоғида мослашувчанлик кўрсатиши кераклигини айтган. Шу билан бирга, у ҳудудлар бўйича ҳам муроса топиш зарурлигини билдирган.
Аввалроқ, Европа давлатлари ва Америка Қўшма Штатлари Украинага хавфсизлик кафолатлари бериши ва бунинг қандай амалга оширилиши бўйича иш олиб бораётгани ҳақида хабар берилганди. Украина мудофаа саноатини кучайтириш учун Европа 90 миллиард доллар ажратиши айтилди.
Изоҳ (0)