Американинг General Motors автоконцерни (GM) Россияни тарк этади. Бу ҳақда «Коммерсантъ» хабар берди.
Дилерлар АҚШ санкциялари билан та’қиқланган автомобилларни етказиб беришни тўхтатиш тўғрисида огоҳлантириш олиб бўлган.
GM Россиядаги офис ходимларини ҳам ишдан бўшатади. Компания Украинадаги ҳарбий ҳаракатлар бошланганидан кейин Россияни тарк этган биринчи хорижий автомобиль ишлаб чиқариш компаниясига айланади.
Таъкидланишича, GM’га Россия офисининг ходимларини ишдан бўшатиш ва дилерларга автомобиллар ва эҳтиёт қисмлар етказиб бериш тўхтатилгани ҳақида хабар юборилган.
11 март куни АҚШдан келаётган автомобилларни Россияга экспорт қилиш та’қиқланган эди. 2015 йилда Қримнинг аннексия қилиниши муносабати билан GM Россияда фаолият доирасини қисқартирган — концерн фақат қиммат Chevrolet ва Cadillac моделларини етказиб беришни бошлаган эди.
Дастлабки уч ой давомида Россияда 266 Chevrolet ва 162 Cadillac автомобиллари сотилган.
Брендлар Россия премиум автомобиллар сегментидаги Европа етакчилари билан бўлган рақобатда ютқазган.
Сўнгги ҳафталарда GM Америка регуляторидан кўрсатмаларни кутаётган эди.
Ўзбекистон санкциялар туфайли Россияга автомобиллар сотишни тўхтатган эди
Аввалроқ Ўзбекистон Россияга автомобиль экспортини тўхтатгани ҳақида хабар берилган эди.
UzAuto Motors автомобилларида Жанубий Кореяда ишлаб чиқарилган яримўтказгичлар ва микрочиплардан фойдаланилади. Жанубий Корея эса Россияга қарши санкцияларга қўшилган.
Агар UzAuto Motors Россияга автомобиль экспорт қилишни давом этганда, Жанубий Корея Ўзбекистонга микрочиплар ва бошқа муҳим бутловчи қисмлар етказиб беришни тўхтатарди. Бу эса Ўзбекистонда автомобиллар ишлаб чиқаришни тўлиқ тўхтатиб қўйиши мумкин.
GM’нинг Детройтдаги вакили UzAuto Motors Россияга Chevrolet автомобилларини экспорт қилишни 9 март куниёқ тўхтатганини айтди. Компания вакили экспорт тўхтатилганини на тасдиқлади, на инкор этди.
«Дарё»нинг маълумотига кўра, компания россиялик ҳамкорлар олдидаги шартнома мажбуриятларини санкциялар жорий этилишидан аввал бажариб бўлган.
Изоҳ (0)