“Ташаббусли бюджет” жараёнларининг 2025 йил 2-мавсуми доирасида саралаш босқичи якунланди ҳамда тарғибот босқичи бошланди. Бу ҳақда 19 август куни Иқтисодиёт ва молия вазирлиги хабар берди.
Маълум қилинишича, 2-мавсум доирасида аҳолидан 22 минг 623 та таклиф келиб тушган. Шундан 18 минг 656 таси саралаш босқичидан ўтказилган.
Жорий йил 19–21 август кунлари саралашдан ўтган лойиҳалар учун тарғибот босқичи ўтказилади. Бунда иштирокчилар лойиҳаларни тарғиб қилиш орқали овоз бериш жараёнига тайёргарлик кўради.
“Ташаббусли бюджет”нинг 2-мавсуми жорий йил 15 июлдан бошланганди. Мазкур мавсум 31 августгача давом этади. Тарғиботдан кейин, 22-31 август кунлари овоз бериш босқичи ўтказилади. Ғолиблар 1 сентябрь куни эълон қилинади.
“Ташаббусли бюджет”нинг жорий йилги 1-мавсумида 2 минг 11 та маҳалла ғолиб деб топилган. Шундан 329 тасигина биринчи марта ғолиб бўлган. Мазкур мавсумда 2024 йил 2-мавсумида ютиб чиққан 826 та маҳалла такроран ғолибга айланган. Шу сабаб уларга жорий йилги 2-мавсум ҳамда 2026 йилги 1-мавсумда танаффус берилган.
Маълумот учун, 2025 йилда “Ташаббусли бюджет” жараёнининг иккита мавсуми учун давлат бюджетидан жами 5,4 триллион сўм ажратилиши белгиланган. Жараёнга туман ва шаҳар бюджетлари қўшимча маблағларининг камида 30 фоизи ҳам йўналтирилади. Умумий олганда, ташаббусли лойиҳаларни молиялаштириш ҳажми 6 триллион сўмга етиши кутилмоқда.
Изоҳ (0)