Ўзбекистондаги халқаро аэропортларни бошқаришга хорижий компаниялар жалб қилинади. Бу ҳақда Sinxua агентлиги хабар берди.
Uzbekistan Airports бошқаруви раиси Раъно Жўраева чоршанба куни Sinxua агентлигига берган интервьюсида бу борадаги дастлабки қадамлар қўйилганини билдирди.
Масалан, бугунги кунда Самарқанд халқаро аэропортини ривожлантиришга 90 миллион долларлик сармоя киритаётган хусусий компания билан пилот лойиҳа амалга оширмоқда.
Биз бу компанияга бутунлай аэропортни эмас, балки аэропортнинг бир қанча функцияларини бошқариш ҳуқуқини топширдик. Айрим функциялар уларнинг тасарруфига ўтган. Масалан, йўловчиларга хизмат кўрсатиш, ёқилғи таъминоти, юк ва почта жўнатмаларини қайта ишлаш, — дейди Раъно Жўраева.
Раъно Жўраева нафақат инвестиция нуқтаи назаридан, балки профессионал аэропорт оператори сифатида ҳам компанияни рақобат асосида танлаш муҳим деб ҳисоблайди.
Агар биз оператор сифатида иш тажрибасига эга бўлмаган компанияни аэропортга жалб қилсак, бу йўловчиларга хизмат кўрсатиш сифатига ва аэропортнинг нормал ишлашига катта таъсир кўрсатади. Биз учун ўз вазифасининг мутахассиси бўлган профессионал компанияларни танлаш муҳим, — дейди Жўраева.
Унинг таъкидлашича, ҳозирда Uzbekistan Airports иккита лойиҳа тайёрлади. Биринчи шартнома Air Marakanda хусусий компанияси билан имзоланиб, Самарқанд шаҳридаги халқаро аэропортга хизмат кўрсатишни бошлади.
Ушбу компания Мюнхен ва Истанбул халқаро аэропортлари мутахассислари билан биргаликда Ўзбекистон учун ягона бўлган ORAT (Операцион тайёрлик, фаоллаштириш ва ўтиш дастурини) амалга ошириш устида ишламоқда.
Бу эса аэропортни ишга туширишда жуда кўп турли технологик ва бизнес жараёнларнинг мураккаб тизимини системалаштириш ва синхронлаштириш имконини беради.
Бундан ташқари, Lufthansa Consulting, KPMG ва Freshfiyelds Bruckhaus Deringer янги аэропорт фаолиятининг молиявий ва ҳуқуқий имкониятларини баҳоламоқда.
Мазкур тизим аэропортлар фаолияти соҳасида илғор технологияларни жорий этиш, авиакомпаниялар, йўловчилар ва аҳоли талабини қондириш, шунингдек, Самарқанд халқаро аэропортини йирик транспорт ва туризм марказига айлантириш имконини беради.
Ҳамкорлик 10 йилдан ортиқ муддат, балки 15-20 йил давом этади. Бу жуда қийин жараён, айниқса, аэропорт бошқаруви соҳасида энг муҳими — йўловчилар хавфсизлиги. Шу боис Uzbekistan Airports АЖ ҳар бир аэропортнинг асосий оператори бўлиб қолади, у хусусий асосда жалб қилинган барча компаниялар фаолиятини ташкил этади, — дея хулоса қилди Раъно Жўраева.
Яқинда Ўзбекистон президенти «Ишбилармонлик муҳитини яхшилаш ва хусусий секторни ривожлантириш орқали барқарор иқтисодий ўсиш учун шарт-шароит яратиш бўйича навбатдаги ислоҳотлар тўғрисида»ги фармонни имзолаган эди.
Ҳужжатга кўра, икки ой муддатда Ўзбекистон аэропорти ва Тошкент халқаро аэропортига бўйсунувчи минтақавий халқаро аэропортларни модернизация қилиш ва улардан фойдаланиш самарадорлигини ошириш мақсадида уларни давлат-хусусий, хусусий сектор бошқарувига ўтказиш тўғрисида қарор лойиҳасини тайёрлаш топширилди.
Аввалроқ Самарқандда 170 млн долларга қайта таъмирланган халқаро аэропорт фойдаланишга топширилгани ҳақида хабар берилган эди.
Изоҳ (0)