Хитой раҳбари Си Цзиньпин бир томонлама санкцияларга қарши чиқди

Хитой раҳбари Си Цзиньпин ҳар йили ўтказиладиган Боао форумидаги нутқи чоғида «бутун сайёрамиздаги тинчлик ва хавфсизликка пут ур етказувчи» бир томонлама санкциялар ва икки томонлама стандартлар сиёсатини танқид қилди, деб хабар бермоқда Reuters.

«Биз бир томонлама санкцияларга қаршимиз ҳамда блоклар тузиш ва қарама-қаршиликни кучайтиришга қаратилган сиёсат олиб бориш ниятида эмасмиз. Хитой инқирозни ҳал қилиш бўйича ҳар қандай саъй-ҳаракатларни қўллаб-қувватлайди, биз икки томонлама стандартларга амал қилмаймиз», — деди у.

Хитой раҳбарининг сўзларига кўра, Пекин маълум бир мамлакатларнинг «узун қўл юрисдиксияси»ни (миллий қонунчиликни мамлакат ташқарисига ёйиш – таҳр.) қатъиян қабул қилмайди. «Фактлар яна бир бор исботладики, ‘Совуқ уруш’ менталитети фақат глобал тинчлик асосларини бузади, гегемонизм ва қўпол куч сиёсати дунё тинчлигига хавф туғдиради, блоклар қарама-қаршилиги эса XXI асрда хавфсизлик муаммоларини янада кучайтиради», — дея хулоса қилди Си Цзиньпин.

Хитой раҳбарининг нутқи Россиянинг Украинага босқини бошлангандан сўнг кўплаб Ғарб давлатларининг Москвага қарши санкциялар киритиши фонида янгради. Ғарб чекловлари Россия президентидан тортиб, молия ва саноат ташкилотларига, давлат корпорацияларига, шунингдек, Марказий банкнинг активларига тааллуқлидир.

Хитой Ғарбнинг Россияга қарши санкцияларини бир неча бор қоралаган. 18 март куни Си Цзиньпин АҚШ президенти Жо Байден билан суҳбатда аллақачон Украинадаги инқироз «Хитой кўришни истайдиган нарса эмас»лигини, Қўшма Штатлар Хитой билан биргаликда тинчлик ва сайёрадаги барқарорликни сақлаш учун жавобгар бўлиши кераклигини айтганди.

Шу билан бирга, Хитой ТИВ Европа департаменти директори Ван Лутонгнинг айтишича, Пекин Москвага қарши санкцияларни қасддан четлаб ўтмайди, бироқ айни пайтда у билан нормал савдо алоқаларини сақлаб турибди. «Хитой Украинадаги можаронинг тарафи эмас. Бу бирор давлат билан савдо-сотиғимизга таъсир қилиши керак, деб ўйламаймиз», — деди у.