Филиппиндаги Меги тропик бўронидан 2,08 миллиондан ортиқ одам жабр кўрди. Табиий офатларнинг олдини олиш ва бошқариш миллий кенгашининг 21 апрель куни эълон қилган ҳисоботида айтилишича, бўрон оқибатида 224 киши ҳалок бўлган.
Кенгаш маълумотларига кўра, циклон тўққизта ҳудудни қамраб олган. 175 мингдан ортиқ кўчирилганлар 447 та эвакуация марказида бўлиб турибди, 33,4 минг киши олдиндан эвакуация қилинган эди. Табиий офат вақтида 147 киши бедарак йўқолган.
Филиппинда Меги бўрони 10,5 минг уйни қисман, 760 тасини бутунлай вайрон қилган, зарарнинг дастлабки миқдори 709,5 минг песо (13,5 минг доллар)ни ташкил этган. 459 та сув тошқини қайд этилган. Қишлоқ хўжалигига етказилган зарар 257 миллион песо (4,9 миллион доллар), 45 та инфратузилма объектига етказилган зарар 6,95 миллион песо (133,2 минг доллар)га баҳоланмоқда. Табиий офат оқибатида 309 та йўл ва 15 та кўприк вайрон бўлган. 76 та шаҳарда электр таъминотидаги узилишлар қайд этилган, шу билан бирга 12 та шаҳарда электр аллақачон тикланган, учта муниципалитетда эса сув таъминоти билан боғлиқ муаммолар сақланиб қолмоқда.
Ҳозиргача саккизта ҳудудда 196 та таълим муассасасида дарслар, 139 та корхонада иш тўхтатилган. 41 та портнинг иши тўхтатилганди, улардан еттитаси ўз фаолиятини тиклади. 18 та шаҳар ва муниципалитетларда фавқулодда ҳолат жорий қилинган. Ҳукумат ёрдам учун 64 миллион песо (1,22 миллион доллар) ажратган.
10 апрель куни Меги тропик бўрони Филиппин шарқидаги Самар, Билиран ва Лейте оролларига урилди. Филиппин Атмосфера, геофизика ва астрономик хизматлар бошқармаси маълумотларига кўра, бўрон ичидаги шамолларнинг максимал тезлиги 20,8 метр/секунддан 29,1 метр/секундгача етган.
Изоҳ (0)