Россия президенти Владимир Путин Мариуполдаги саноат зоналарига ҳужумни бекор қилишни буюрди. Унинг ҳисоблашича, бу мақсадга мувофиқ эмас. Бу ҳақда Путин мудофаа вазири Сергей Шойгу билан учрашувда маълум қилди, деб хабар беради «Интерфакс».
«Ҳозир биз аскар ҳамда офицерларимизнинг ҳаёти ва соғлиғини сақлаб қолишни ўйлашимиз керак бўлган вақт (яъни бу ҳақда доим ўйлашимиз керак, ҳозир айниқса). Ушбу саноат объектлари остидаги катакомбаларга (чалкаш йўллар — таҳр.) тушиб, эмаклаш керак эмас», — дейди Путин.
«Мазкур саноат зонасини ҳатто пашша ҳам учиб ўта олмайдиган қилиб, блоклаб қўйинг», — дея қўшимча қилган президент.
Шойгу Путин билан учрашувда «Азовсталь»дан бошқа бутун Мариупол Россия қўшинлари томонидан назоратга олинганини маълум қилган. «Азовсталь»га икки мингга яқин украиналик ҳарбий хизматчилар яширинган. Вазирнинг қўшимча қилишича, завод ҳудуди қуршовга олинган.
Аввалроқ ўзини ўзи республика деб эълон қилган Донецк Халқ Республикаси халқ милицияси вакили Эдуард Басурин махсус гуруҳлар Мариуполдаги «Азовсталь» металлургия заводига ҳужумни бошлаганини маълум қилганди. Заводда аёллар ва болалар борлиги ҳақида аввалроқ Украина денгиз корпусининг 36-алоҳида бригадаси командири майор Сергей Волин гапирган эди.
Мавзуга доир: Киев тинч аҳоли ва ҳарбийларни қутқариш учун Мариуполда музокаралар ўтказиш таклифи билан чиқди
Изоҳ (0)