Фарзандини даволатиш учун саховатли инсонлардан ёрдам сўраб интернетда эълон берган ангренлик аёлнинг пулларини ўзлаштириб олган мактаб ўқувчиси ушланди, деб хабар беради Тошкент вилояти ИИББ матбуот котиби.
Ангрен шаҳри «Тараққиёт» МФЙда яшовчи 45 ёшли фуқаро М.С. ИИБга ариза билан мурожаат қилиб, фарзандини даволатиш учун моддий ёрдам йиғиш мақсадида ижтимоий тармоқда эълон қилган пластик картаси ҳисобига 600 минг ўтказишини айтиб, қўнғироқ қилган номаълум кимса унинг ҳисобидаги 2 миллион сўмни ечиб олганини билдирган ва ҳолат юзасидан қонуний чора кўришни сўраган.
Аризага асосан Тошкент вилояти ИИББ ахборот технологиялари соҳасидаги жиноятларга қарши курашиш ҳамда шаҳар ИИБ ЖҚБ тезкор ходимлари томонидан олиб борилган суриштирув ишлари натижасида ушбу жиноятни Қорақалпоғистон Республикасида яшовчи 18 ёшли Ж.А. (11-синф ўқувчиси) содир этгани аниқланган.
Ушбу ҳолат юзасидан фуқаро Ж.А. га нисбатан Жиноят кодексининг 169-моддаси (ўғрилик) 1-қисми билан жиноят иши қўзғатилган. Тергов ҳаракатлари олиб борилмоқда.
Бундан олдин Бухорода хайрия пластик картасига йиғилган 1 миллион сўмни ўғирлаган 18 ёшли фуқаро қўлга олингани, Тошкент вилоятида Telegram орқали ўзганинг пластик картасидан 2,5 миллион сўм ечиб олган 10-синф ўқувчиси ушлангани тўғрисида хабар берилганди.
Мавзуга доир:
- Самарқандлик 19 ёшли қиз уч ёшли Эъзозани даволаш учун берилган 25 млн сўмлик хайрия пулларини ўзлаштиришга уринди
- Фарғонада фирибгар эркак Тошкентдаги беморларнинг хайрия пулларини ўзлаштириб олгани аниқланди
- Тошкентда хайрия пулларини ўғирлаш билан шуғулланган киберфирибгарлар гуруҳи қўлга олинди (видео)
Изоҳ (0)