Жиззахда мактаб ўқувчиларини олиб кетаётган Саз русумли автобуслар иштирокида ЙТҲ юз берди. Бу ҳақда «Ёшлар» телаканалининг «Давр» информацион дастурида маълум қилинди.
Қайд этилишича, воқеа 17 апрель куни соат 17:00 ларда Тошкент—Термиз М-39 йўлининг 1018-километрида юз берган. Ўқувчилар Самарқанд шаҳрига саҳоят учун олиб борилган ва қайтишда — Жиззахнинг Ғаллаорол туманида ҳайдовчиларнинг белгиланган масофани сақламаслиги оқибатида бири иккинчисининг орқасига бориб урилган.
Оқибатда Шароф Рашидов тумани Халқ таълими бўлимига қарашли мактабнинг икки нафар 8-синф ўқувчиси енгил тан жароҳати олган ва Республика шошилинч тиббий ёрдам илмий маркази Жиззах филиалида уларга биринчи тиббий ёрдам кўрсатилган. Бошқа ҳеч ким жабрланмаган.
Ўрганишлар натижасида ЙТҲда иштирок этган автобуслар Зарбдор тумани ХТБга қарашли 2-мактаб раҳбарияти томонидан ёллангани, мактаб масъуллари ўқувчиларни ўзбошимчалик билан, тегишли давлат органлари рухсати ва кузатувисиз ХТБни огоҳлантирмасдан, саҳоятга олиб боришгани маълум бўлган. Сўнг хавфсизлик чораларини кўриш мақсадида ЙПХ ходимлари томонидан саёҳатга борган бошқа автобуслардан иборат жамланма сафига қўшиб олинган.
Аммо шунда ҳам йўл қоидаларига бепарво қаралгани сабаб юқоридаги ЙТҲ юз берган.
Хабарда айтилишича, мактабнинг масъулиятсизликка йўл қўйган ходимларини ишдан олиш чоралари кўрилган. Шунингдек, йўл ҳаракати қоидаларига амал қилмаган ҳайдовчига ҳам Маъмурий жавобгарлик тўғрисидаги кодекснинг тегишли моддалари билан чора кўрилган.
Эслатиб ўтамиз, 2019 йилининг апрелида Ўрта Чирчиқ туманида ўқувчиларни Бухорога саёҳатга олиб бориб қайтаётган автобус баллони ёрилиб, бетон тўсиққа урилиб, ёнғин чиққанди. Йўловчилар автобусдан зудлик билан эвакуация қилинган.
Изоҳ (0)