Расман: Иброҳимхалил Йўлдошев «Нижний Новгород» билан шартномасини узайтирди

«Нижний Новгород» Иброҳимхалил Йўлдошев билан янги шартнома имзолади. Бу ҳақда клуб расмий сайтида маълум қилинди.

Ҳимоячи Россия клуби билан 3 йилга мўлжалланган шартномага имзо чекди.

Ўзбекистонлик футболчи жорий мавсум 17 та ўйинда майдонга тушиб, битта гол ва 2 та голли узатмани амалга оширган. Иброҳимхалил март ойида клубнинг энг яхши футболчиси деб топилганди.

Шартнома узайтирилиши борасида «Нижний Новгород» бош директори Равил Измайлов ўз фикрларини билдириб ўтди:

«Йўлдошев — Ўзбекистон терма жамоасининг иқтидорли ва келажаги бор ўйинчиси. Жорий мавсумда у Россия чемпионатига мослашди, мухлислар уни яхши кўради ва ҳурмат қилади. Иброҳимхалил бош мураббийнинг ишончига кирган. Инсон сифатида ҳам у яхши томонларини кўрсата олди. Унга ривож ва клубимиздаги ўйинларда муваффақият тилаймиз».

Иброҳимхалил Йўлдошев «Пахтакор» жамоаси тарбияланувчиси ҳисобланади. Бир мавсум «Бунёдкор» сафида ижарада ўйнаган Йўлдошев 2021 йил август ойида «Нижний Новгород» сафига ўтган эди.