Канада Россияга қарши санкциялар рўйхатини кенгайтирди ва яна 14 нафар россиялик бизнесмен ҳамда амалдорларга қарши тақиқлар қўллади. Бу ҳақда Канада Ташқи ишлар вазирлиги хабар берган.
- Алфа-банк директорлар кенгашининг собиқ раҳбари Петр Авен;
- Finstar инвестиция гуруҳи асосчиси Олег Бойко;
- «Алфа-Груп» асосчиси Михаил Фридман;
- «Сафмар» гуруҳи директорлар кенгаши раиси Михаил Гуцериев;
- «Арети» компаниялари халқаро гуруҳи президенти, Россия Велоспорт федерацияси президенти Игорь Макаров;
- Россия банки раҳбари Элвира Набиуллина;
- Виоленчел созандаси Сергей Ролдугин;
- Россия банки раҳбарининг собиқ ўринбосари Александ Торшин;
- LetterOne инвестиция гуруҳи директорлар кенгашининг собиқ аъзоси Герман Хан;
- Шереметьево аэропорти директорлар кенгашининг собиқ раҳбари Александр Пономаренко;
- Катерина Тихонова ва Мария Воронцова;
- Россия ташқи ишлар вазири Сергей Лавровнинг рафиқаси Мария Лаврова ҳамда қизи Екатерина Винокурова Канаданинг санкциялар рўйхатига киритилган.
Катерина Тихонова Москва давлат университетининг мураккаб тизимлар устида математик тадқиқотлар олиб борувчи институтида директор ўринбосари лавозимида фаолият олиб боради, шунингдек «Миллий интеллектуал ривожланиш» фондини бошқаради, Москва давлат университетидаги миллий интеллектуал захира марказига ҳам ўриндошлик асосида раҳбарлик қилади. Иккала тузилма ҳам «Иннопрактика» бренди устида иш олиб боради.
«Иннопрактика» юқори технологиялар соҳасидаги ишланмалар билан шуғулланади ва МДУ базасидаги технологик водий концепциясини амалга ошириш ташаббускорларидан ҳисобланади.
Аввал Reuters ва Bloomberg агентликлари Тихоновани Россия президенти Владимир Путиннинг қизи деб атаганди.
Эндокринолог Мария Воронцова — генетик технологияларни илмий-техник ривожлантиришнинг федерал дастури кенгашининг аъзоси, эндокринология миллий тиббиёт тадқиқот марказининг етакчи илмий ходими ва Россия ёш эндокринологлар жамияти раисининг ўринбосари. BBC’нинг рус хизмати Воронцова Владимир Путиннинг тўнғич қизи эканлигини билдирган, New Times ҳамда Reuters агентликлари ҳам бу ҳақда хабар берган.
Маълумотлар расман ўз тасдиғини топмаган ва инкор ҳам этилмаган. 2015 йил декабрь ойидаги матбуот анжуманида Путин хавфсизлик масалалари туфайли оиласини жамоатчилик олдида муҳокама қилмаслигини таъкидлаган.
Канада февраль ойида Владимир Путин, Сергей Лавров ва Россия ҳукуматининг бошқа вакилларига қарши санкциялар қўллаган. Шунингдек, Оттава Россия компаниялари, банклари, жисмоний шахслар ва депутатларни ҳам санкциялар рўйхатига киритган. АҚШ, Европанинг бир қатор давлатлари, шу билан бирга Осиёнинг айрим мамлакатлари ҳам Россияга қарши санкциялар жорий этган.
Россия ТИВ ушбу санкцияларни очиқчасига қилинаётган қароқчилик ҳаракати деб атаган. Россия ТИВ иқтисодий ҳамкорлик департаменти директори Дмитрий Биричевский бир томонлама санкциялардан фойдаланилаётгани дунёнинг барча мамлакатларига таъсир кўрсатишини қайд этган. Шунингдек, у Россиянинг жавоб ҳаракатларига тайёрлигини маълум қилган.
Биричевскийнинг сўзларига кўра чекловларнинг муаллифлари Россиянинг глобал иқтисодиётга қай даражада чуқур интеграция бўлиб кетганини тушунмайди. Таҳлилчининг қайд этишича Россия корхоналари ишлаб чиқариш занжирларининг ҳалқасига айланган ва уларни алмаштириш жуда қийин.
Изоҳ (0)