Россиянинг эътирозларига қарамай, Қўшма Штатлар Украинага ҳарбий ёрдам кўрсатишда давом этади, деди Оқ уй матбуот котиби Жен Псаки матбуот брифингида.
«Мен Россия президенти Владимир Путин ёки Россия раҳбариятининг қуруқ таҳдидлари устида фикр юргизмоқчи эмасман», — деди Псаки. У Россиянинг Украинага қурол етказиб беришни тўхтатиш талаби ҳақидаги саволга шундай жавоб берди.
Псакининг таъкидлашича, АҚШ расмийлари Россиянинг Украинага бостириб кириши муносабати билан бошидан режалаштирилган ишларни амалга оширган, яъни ҳарбий ва иқтисодий ёрдам кўрсатган, шунингдек, Украина халқини қўллаб-қувватлаган. «Биз бунда давом этамиз», — деди Жо Байден маъмуриятининг расмий вакили.
Апрель ойи бошида Россия Қўшма Штатларга дипломатик нота йўллаб, Украинага «энг сезгир қурол тизимларининг» етказиб берилиши «оловга ёғ сепиш» экани ва бу «олдиндан айтиб бўлмайдиган оқибатларга» олиб келиши мумкинлиги ҳақида огоҳлантирган эди. Бу ҳақда 14 апрель куни дипломатик нота нусхасини ўрганган The Washington газетаси, шунингдек, CNN манбалари ҳам хабар берган.
Россия Ташқи ишлар вазирлиги расмий вакили Мария Захарова 15 апрель куни бу маълумотни тасдиқлаб, нота «барча давлатларга» юборилганини маълум қилган.
Апрель бошида АҚШ Сенати Украинага ленд-лиз дастури билан қурол етказиб бериш ҳақидаги қонун лойиҳасини маъқуллаганди. Қонун Жо Байденга Украинага қурол ва бошқа ёрдамлар етказиб беришни тезлаштириш имконини беради.
Изоҳ (0)