ДХХ Бухорода гиёҳванд моддани 2,5 минг долларга сотишга уринган Афғонистон фуқаросини ушлади (видео)

Давлат хавфсизлик хизматининг Бухоро вилояти бўйича бошқармаси томонидан гиёҳванд моддаларнинг ноқонуний айланмасига қарши курашиш доирасида ўтказилган тезкор-қидирув тадбирлари натижасида бир гуруҳ оғуфурушлар фаолиятига чек қўйилди. Бу ҳақда ДХХ ахборот хизмати хабар қилди.

Қайд этилишича, наркотик моддалар савдоси билан шуғулланиб келган Қоракўл туманида яшовчи фуқаро (1983 йилда туғилган) кўп миқдордаги гиёҳвандлик воситасини сотмоқчи экани тўғрисида маълумотлар олинган. Унга кўра тезкор тадбир режаси ишлаб чиқилган ва наркосавдогар кузатувга олинган.

Қоракўл тумани «Тайқир» МФЙ ҳудудидан ўтувчи йўл ёқасида у 1 килограмм 681 грамм опий моддасини муқаддам судланган шахсга (1959 йилда туғилган) 9 минг 100 долларга сотган вақтида уларнинг ҳар иккиси ҳам қўлга олинган.

Шунингдек, дастлабки суриштирув ҳаракатлари давомида оғуфуруш келгусида сотиш мақсадида яшаш хонадонининг томорқасига 1 кг 68 гр опий моддасини яшириб қўйгани маълум бўлган. У ҳам холислар иштирокида процессуал тартибда расмийлаштириб олинган.

Мусодара этилган гиёҳвандлик воситалари афғонистонлик наркокурерлар томонидан келтирилгани тўғрисида маълумотлар олинган. Хизмат ходимлари ҳамда вилоят Божхона ва Ички ишлар бошқармалари ходимлари ҳамкорлигида тезкор тадбирнинг иккинчи босқичи амалга оширилган.

Натижада Афғонистон фуқароси (1971 йил Афғонистоннинг Балх вилоятида туғилган) 940 грамм опий моддасини Бухоро шаҳрига олиб келиб, 2 минг 500 долларга сотган вақтида қўлга олинган.

Ушбу гиёҳвандлик воситаси бошқа афғон наркокурьерлари томонидан божхона назоратидан яшириб, мамлакатимиз ҳудудига олиб ўтилган. Ўтказилган тезкор тадбирлар натижасида жами 3 кг 689 гр опий моддаси мусодара қилинган.

Ҳолат юзасидан Давлат хавфсизлик хизматининг Бухоро вилояти бўйича бошқармаси Тергов бўлими томонидан ҳар учала фуқарога нисбатан Жиноят кодексининг 273-моддаси 5-қисми билан жиноят иши қўзғатилган. Ҳозирда тергов ҳаракатлари олиб борилмоқда.

Бундан ташқари, Давлат хавфсизлик хизматининг Андижон вилояти бўйича бошқармаси ходимлари томонидан тезкор тадбир ўтказилган. Унда Қорасув шаҳрида яшовчи фуқаро (1993 йилда туғилган) қирғизистонлик наркокурьерлар томонидан Андижон шаҳрига етказиб берилган 5 кг 311 гр гашиш моддасини қабул қилиб олган вақтида ушланган.

Шунингдек, унинг яшаш манзилида 224 дона «Тропикамид» кучли таъсир қилувчи дори воситалари борлиги аниқланиб, тегишли тартибда расмийлаштириб олинган.

Унинг жиноий шериги бўлган Қорасув шаҳрида яшовчи шахс (1994 йилда туғилган) ҳам қўлга олинган.

Ҳозирда Давлат хавфсизлик хизматининг Андижон вилояти бўйича бошқармаси Тергов бўлими томонидан мазкур икки фуқарога нисбатан жиноят иши қўзғатилган.