Самарқандда фуқарони Украинадаги ОТМда ўқиши тўғрисида ҳужжат тайёрлаб, уни Ўзбекистондаги олий таълим муассасаларидан бирига кўчириш эвазига пул талаб қилган шахслар ушланди, деб хабар беради ЎзА.
Маълум қилинишича, Давлат хавфсизлик хизмати Самарқанд вилояти бошқармаси ҳамда вилоят ИИБ ходимлари ҳамкорлигида тезкор тадбир ўтказилган. Тезкор тадбир давомида Самарқанд шаҳридаги ўқув марказларидан бирининг раҳбари 22 ёшли Р.Ҳ. ва «Агробанк» ходими Х.Ф. маҳаллий фуқарога Украина олийгоҳининг 1-курсида ўқигани тўғрисида ҳужжат тайёрлаб, кейинчалик ўқишини Самарқанд иқтисодиёт ва сервис институтига кўчириб беришни ваъда қилгани аниқланган.
Улар ўз «хизмати эвазига» 5 минг доллар сўраган ва пулнинг 2,5 минг долларини олаётган вақтида ҳуқуқ-тартибот органлари ходимлари томонидан ушланган.
Ҳозирда ушбу шахсларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Аввалроқ Бухорода фуқаронинг Тожикистондаги ўқишини кўчириб бериш учун 2 минг доллар олган аёл қўлга тушгани, Сурхондарёда фуқаронинг Тожикистондаги ўқишини 1,5 минг доллар эвазига кўчириб беришни ваъда қилган шахс ушлангани тўғрисида хабар берилганди.
Мавзуга доир:
- Андижонда фуқароларнинг хориждаги ўқишини Ўзбекистонга кўчириб бериш учун жами 3,1 минг доллар олган шахслар ушланди
- Фарғонада 30 нафар талабанинг ўқишини Қирғизистондан Ўзбекистонга кўчириб бериш учун 67 минг доллар олган шахслар ушланди
- Фарғонада фуқаронинг Тожикистондаги ўқишини 1,2 минг доллар эвазига кўчириб беришни ваъда қилган шахс ушланди
Изоҳ (0)