Италия санкцияга учраган Алишер Усмоновга тегишли 670 минг долларлик ҳашаматли ўқ ўтказмайдиган лимузинини мусодара қилди. Бу ҳақда Италиянинг Corriere della Sera газетаси хабар бермоқда.
Corriere della Sera хабарига кўра, ҳукумат сўнгги бир неча кун ичида тоғ-кон ва телекоммуникация магнати Алишер Усмоновга тегишли қора рангдаги Mercedes-Maybach S650 Guard VR10 русумли автомашинасини Ўрта Ер денгизидаги Сардиния оролида ҳибсга олди. Бу маълумотни бошқа нашрлар ҳам тасдиқламоқда.
Италия солиқ полицияси 29 март, сешанба куни The Times нашрига автомобиль Усмоновнинг оролдаги ҳибсга олинган мулклари орасида эканини тасдиқлади.
Италиянинг маҳаллий газетаси L’Unione Sarda ҳам расмийлар унинг Певеро кўрфазидаги 17 млн евро ёки тахминан 19 млн долларлик кўчмас мулк мажмуасини ва олтита корпоратив автомобилини мусодара қилгани ҳақида хабар берди. L’Unione Sarda маълумотларига кўра, унинг Сардиниядаги мусодара қилинган активлари жами 66 млн евро ёки тахминан 73 млн долларни ташкил этади.
Беш тонналик Maybach тахминан 600 минг евро ёки тахминан 670 минг доллар туради. Зирҳли қоплама ва 10 сантиметр қалинликдаги деразалар портлаш ва пулемёт ҳужумларига бардош беришга мўлжалланган. Mercedes бир вақтнинг ўзида иккита гранатанинг портлашига бардош бера олиши айтилмоқда.
Усмоновга 28 февраль куни Европа Иттифоқи томонидан санкция қўлланилган эди.
Буюк Британия ва АҚШ санкциялари нишонига айланган миллиардернинг матбуот котиби ўтган ҳафта The Guardian нашрига у ўзининг баъзи активларини, жумладан, Буюк Британиядаги иккита уйини ишончли одамлар номига ўтказганини ва энди уларга эгалик қилмаслигини айтди.
Усмонов Bloomberg’нинг Миллиардерлар индексига кўра, 18,7 млрд долларлик бойлик билан Россиянинг бешинчи энг бой одами ҳисобланади.
Аввалроқ Reuters санкцияларга учраган Алишер Усмоновнинг мулклари ҳақида маълум қилган эди.
Изоҳ (0)